FIFA World Cup : ఫిఫా వరల్డ్ కప్ ఫైనల్ అర్జెంటీనా, ఫ్రాన్స్ జట్ల మధ్య ఆదివారం జరగనుంది. ఈ మ్యాచ్కోసం ప్రపంచం మొత్తం ఎదురు చూస్తోంది. ఈ మ్యాచ్ సందర్భంగా ప్రపంచవ్యాప్తంగా ఉన్న ఫుట్బాల్ అభిమానులకు ఉక్రెయిన్ అధ్యక్షుడు జెల్న్స్కీ శాంతి సందేశం ఇవ్వాలనుకున్నాడు. అందుకు అనుమతి ఇవ్వాలని ఫిఫా యాజమాన్యాన్ని కోరాడు. అయితే, అందుకు ఫిఫా ఒప్పుకోలేదు. దాంతో లక్షలాది మంది అభిమానుల సమక్షంలో మాట్లాడాలి అనుకున్న ఆయన నిరాశ చెందాడు. జెల్న్స్కీ ఫైనల్ మ్యాచ్లో వీడియో ద్వారా శాంతి సందేశం ఇవ్వాలని అనుకున్నాడు. అయితే.. వరల్డ్ కప్ మ్యాచ్ల సందర్భంగా రాజకీయాలకు సంబంధించిన విషయాలకు చోటివ్వకూడదు అని ఫిఫా అనుకుంది. అందుకనే జెల్న్స్కీకి అనుమతి ఇవ్వలేదు.
ఈ ఏడాది ఫిబ్రవరిలో రష్యా, ఉక్రెయిన్పై యుద్ధానికి దిగింది. దాంతో, జెల్నెస్కీ ప్రపంచ వేదికల మీద శాంతి సందేశాన్ని వినిపించాడు. తమకు సాయం చేయాలని ప్రపంచ దేశాలు కోరాడు. ఇజ్రాయేల్ పార్లమెంట్లో, అమెరికా ఉభయ సభల్లో, జీ 20 సదస్సులో జెలెన్స్కీ వీడియో కాన్ఫరెన్స్ ద్వారా శాంతి సందేశం వినిపించారు. అంతేకాదు ఈ ఏడాది గ్రామీ అవార్డుల వేడుకలో, కేన్స్ ఫిల్మ్ ఫెస్టివల్లోనూ ఆయన తన సందేశం తెలియజేశారు.
ఖతర్లో నిరసన గళాలు వినిపించకుండా ఫిఫా అన్ని చర్యలు తీసుకుంది. అందులో భాగంగానే ఎల్జీబీటీ మద్దతుదారులను స్టేడియాల్లోకి అనుమతించలేదు. ఆటగాళ్లు ఎవరూ రెయిన్బో కలర్ బ్యాడ్జిలు ధరించ వద్దని తేల్చి చెప్పింది. అంతేకాదు మ్యాచ్ సమయంలో తమ దేశ జెండాలు తప్ప ఇతర జెండాలను ప్రదర్శించడం పట్ల నిషేధం విధించింది. రెయిన్ బో కలర్ టీ షర్ట్ వేసుకుని అమెరికా, వేల్స్ జట్ల మ్యాచ్ చూసేందుకు వెళ్లిన గ్రాంట్ వహ్ల్ అనే అమెరికా జర్నలిస్ట్ సెక్యూరిటీ గార్డు అడ్డుకున్నాడు. ఈ విషయాన్ని గ్రాంట్ ట్విట్టర్ ద్వారా వెల్లడించాడు. విషాదం ఏంటంటే.. రెండు రోజుల తర్వాత అతను గుండెపోటుతో ప్రాణాలు విడిచాడు.