Bangladesh | ఢాకా: ప్రభుత్వ ఉద్వోగాల్లో రిజర్వేషన్ల విధానాన్ని వ్యతిరేకిస్తూ విద్యార్థులు, యువత ఆందోళనలతో బంగ్లాదేశ్ అట్టుడుకుతున్నది. ఆందోళనలు హింసాత్మకంగా మారడంతో ఇప్పటి వరకు 123 మంది మరణించారని, వందలాది మంది గాయపడ్డారని స్థానిక మీడియా పేర్కొన్నది. ఆందోళనలు కొనసాగుతున్న నేపథ్యంలో పోలీసులు కఠిన చర్యలు తీసుకొన్నారు. దేశవ్యాప్తంగా కర్ఫ్యూ విధించడంతోపాటు ‘కనిపిస్తే కాల్చివేత’ ఉత్తర్వులు జారీచేశారు. ఇంటర్నెట్, ఎస్ఎంఎస్ సర్వీసులను నిలిపివేశారు. పెద్దయెత్తున పోలీసులు, సైనిక బలగాలను మోహరించారు. పరిస్థితిని అదుపు చేయలేని క్రమంలో ఆందోళనకారులపై కాల్పులు జరిపేందుకు అధికారులకు అనుమతి ఇచ్చినట్టు అధికార అవామీ లీగ్ పార్టీ ప్రధాన కార్యదర్శి ఒబైదుల్ క్వాదెర్ తెలిపారు. ఢాకాలో సైనిక బలగాలు శనివారం పెట్రోలింగ్ నిర్వహించాయి. కర్ఫ్యూ ఆదివారం ఉదయం వరకు కొనసాగుతుందని, ఆ తర్వాత కొనసాగింపుపై ప్రభుత్వం నిర్ణయం తీసుకుంటుందని అధికార వర్గాలు తెలిపాయి.
బంగ్లాదేశ్లో ప్రస్తుత పరిస్థితుల వేళ ప్రధాని షేక్ హసీనా తన అధికారిక విదేశీ పర్యటనను రద్దు చేసుకొన్నారు. పర్యటనలో భాగంగా ఆమె స్పెయిన్, బ్రెజిల్ వెళ్లాల్సి ఉంది. మరోవైపు ఆందోళనలు చేస్తున్న విద్యార్థులను ప్రధాని చర్చలకు ఆహ్వానించారు.
ఈనెల 14న ప్రధాని చేసిన ప్రకటన విద్యార్థులకు కోపం తెప్పించింది. ‘స్వాతంత్య్ర సమరయోధుల పిల్లలకు రిజర్వేషన్ల ప్రయోజనాలు అందకపోతే.. ఇంకెవరు పొందాలి? రజాకార్ల మనవళ్లకా?’ అని ప్రధాని హసీనా చేసిన వ్యాఖ్యలపై విద్యార్థులు మండిపడుతున్నారు. ‘నేనెవరిని? రజాకార్నా?’ అనే నినాదం ఎత్తుకొన్నారు. ప్రధాని వ్యాఖ్యలను తిప్పికొడుతూ ‘నీవెవరు? నేనెవరు? రజాకార్, రజాకార్!’ అనే నినాదం ప్రారంభించారు.
బంగ్లాదేశ్లో ఆందోళనకర పరిస్థితుల నేపథ్యంలో అక్కడి భారత విద్యార్థులు స్వదేశానికి వస్తున్నారు. శనివారం నాటికి దాదాపు వెయ్యి మంది దేశానికి తిరిగి వచ్చారని భారత విదేశాంగ శాఖ వెల్లడించింది. ఇందులో 778 మంది సరిహద్దు రాష్ర్టాల గుండా రోడ్డు మార్గాల ద్వారా, దాదాపు 200 మంది ఢాకా, చిట్టగాంగ్ల నుంచి విమానాల్లో వచ్చారని తెలిపింది. బంగ్లాదేశ్లోని యూనివర్సిటీల్లో ఇంకా 4 వేల మంది భారతీయ విద్యార్థులు ఉన్నారని, వారితో ఢాకాలోని భారత రాయబార కార్యాలయం నిరంతర సంప్రదింపులు చేస్తున్నదని, తగిన సాయం అందజేస్తున్నదని వెల్లడించింది. బంగ్లాదేశ్లో ఉంటున్న భారతీయులు అత్యవసరం కాని ప్రయాణాలు చేయొద్దని, ఇండ్లలోనే ఉండాలని విదేశాంగ శాఖ అడ్వైజరీ జారీచేసింది.