బీజింగ్: చైనాలో భారీ వర్షాలు(China Rains) కురుస్తున్నాయి. ఆకస్మికంగా వచ్చిన వరదలతో.. శనివారం షాంగ్జీ ప్రావిన్సులో ఓ బ్రిడ్జ్ కూలింది. ఆ ప్రమాదం వల్ల 11 మంది మృతిచెందారు. మరో 30 మంది గల్లంతయ్యారు. జాసుయి కౌంటీలో ఉన్న డానింగ్ ఎక్స్ప్రెస్వే నుంచి నదిలో పడ్డ అయిదు వాహనాల నుంచి 11 మంది మృతదేహాలను వెలికితీసినట్లు చైనా మీడియా పేర్కొన్నది. అయితే ఈ ప్రమాదం వల్ల అదృశ్యమైన మరో 20 వాహనాల ఆచూకీ ఇంకా తెలియలేదు.
ఈ ప్రమాదం పట్ల అధ్యక్షుడు జీ జిన్పింగ్ ఆరా తీశారు. రెస్క్యూ ఆపరేషన్ చేపట్టాలని ఆయన ఆదేశించారు. ప్రస్తుతం దేశంలో వరద నియంత్రణ సమస్యాత్మకంగా ఉన్నట్లు జిన్పింగ్ తెలిపారు. అయితే స్థానిక ప్రభుత్వాలు బాధ్యతలు తీసుకుని , అన్నింటిని మానిటర్ చేయాలని ఆయన పేర్కొన్నారు.
నేషనల్ ఫైర్ అండ్ రెస్క్యూ అథారిటీ.. బ్రిడ్జ్ కూలిన ప్రదేశానికి ప్రత్యేక బృందాన్ని పంపినట్లు చెప్పింది. రెస్క్యూ బృందంలో 859 మంది, 90 వాహనాలు, 20 బోట్లు, 41 డ్రోన్లు ఉన్నట్లు తెలిసింది.