గాజా, జూన్ 8: పలు ప్రపంచ దేశాలు, ఐరాస వారిస్తున్నా గాజాపై ఇజ్రాయెల్ దాడులు కొనసాగుతూనే ఉన్నాయి. శనివారం సెంట్రల్ గాజాలోని ఒక శరణార్థి శిబిరంపై జరిగిన దాడిలో 210 మంది మరణించారు. ఈ దాడి సందర్భంగా హమాస్ చెరలో బందీగా ఉన్న నలుగురు ఇజ్రాయెల్ పౌరులను రక్షించినట్టు అధికారులు తెలిపారు. నుసిరత్ శిబిరంపై దాడిలో 210 మంది మరణించగా, 400 మంది గాయపడ్డారని హమాస్ ప్రభుత్వ మీడియా వెల్లడించింది. కాగా, నుసిరత్లోని ఉగ్ర స్థావరాలను లక్ష్యంగా చేసుకుని దాడులు చేస్తున్నట్టు ఇజ్రాయెల్ మిలటరీ ప్రకటించింది. అయితే ఇజ్రాయెల్ దాడులకు తామ భయపడేది లేదని, ప్రతిదాడులు చేస్తూనే ఉంటామని హమాస్ నేత ఇస్మాయెల్ హనియెహ్ పేర్కొన్నారు.
ఉత్తర గాజాలో ఐరాస నడుపుతున్న ఓ బడిపై ఇజ్రాయెల్ దళాలు శుక్రవారం దాడి చేశాయి. హమాస్ ఉగ్రవాదులు ఇక్కడి నుంచి కార్యకలాపాలు నిర్వహిస్తున్నారని తెలిపింది. ఈ దాడిలో ముగ్గురు మరణించినట్లు పాలస్తీనా అధికారులు చెప్పారు. ఇజ్రాయెల్ గురువారం సెంట్రల్ గాజాలోని ఓ బడిపై జరిపిన దాడిలో 33 మంది మరణించిన సంగతి తెలిసిందే.