Actress arrest | ఇరాన్లో మూడు నెలలుగా హిజాబ్ వ్యతిరేక ఆందోళనలు కొనసాగుతున్నాయి. ఈ నిరసనలకు మద్దుతుగా నిలిచి ఆందోళనలో పాల్గొన్న ఆస్కార్ అవార్డు విన్నింగ్ సినిమాలో నటించిన తరనేహ్ అలిదోస్తీని ఇరాన్ పోలీసులు అరెస్ట్ చేశారు. ఇరాన్ ప్రభుత్వం ఉద్యమకారులపై ఉక్కుపాదం మోపుతున్నదని, మరణశిక్షలు కూడా విధిస్తున్నదని ఆరోపిస్తూ తన ఫొటోను ఇన్స్టాగ్రామ్లో షేర్ చేశారు. ఇందులో ఆమె హిజాబ్ ధరించలేదు. పోలీసు కస్టడీలో ఉన్న మొహ్సీన్ షెఖ్రీకి మరణశిక్ష విధించడాన్ని ఈ నటి తీవ్రంగా వ్యతిరేకిస్తున్నది. ఇన్స్టాగ్రామ్లో షేర్ చేసిన ఈ ఫొటోను 10 లక్షల మందికి పైగా లైక్ చేశారు. దాంతో ఆమె ఇన్స్టా ఆకౌంట్ను మూసేశారు. నటి అలిదోస్తీకి ఇన్స్టాలో 80 లక్షలకు పైగా ఫాలోవర్లు ఉండటం విశేషం.
హిజాబ్ ఉద్యమానికి మద్దతుగా నిలిచిన ప్రముఖ నటిని శనివారం అరెస్టు చేసినట్లు ఇరాన్ మీడియా శనివారం తెలిపింది. ‘తప్పుడు, వక్రీకరించిన కంటెంట్ను ప్రచురించి గందరగోళాన్ని ప్రేరేపించినందుకు’ 38 ఏండ్ల తరనేహ్ అలిదోస్తీని అదుపులోకి తీసుకున్నట్లు తస్నిమ్ వార్తా సంస్థ తెలిపింది. 2016లో ఆస్కార్ అవార్డును గెలుచుకున్న ‘ది సేల్స్మాన్’ చిత్రంలో ఆమె తన పాత్ర ద్వారా ప్రపంచ ప్రసిద్ధి పొందారు. ఈ ఏడాది కేన్స్ ఫిల్మ్ ఫెస్టివల్లో అలిదోస్తీ నటించిన ‘లీలాస్ బ్రదర్స్’ సినిమాను ప్రదర్శించారు.
తరనేహ్ అలిదోస్తీ పోస్ట్ చేసిన ఫొటోలో ఒక పేపర్ పట్టుకుని ఉన్నారు. ఆ పేపర్లో ‘స్త్రీలు, జీవితం, స్వేచ్ఛ’ అని రాసి ఉన్నది. ఈ నినాదాన్ని ఇరాన్ మహిళలు అక్కడి ప్రభుత్వానికి వ్యతిరేకంగా వాడుతున్నారు. ఇలాఉండగా, ఆమెను ఎందుకు అరెస్ట్ చేశారన్నది ఇంకా ప్రభుత్వం స్పష్టంగా ప్రకటించలేదు. ఆమె సినిమా దర్శకుడి ప్రకటన అనంతరం అలిదోస్తీ అరెస్టుపై స్థానిక మీడియా వార్తలను ప్రచురించాయి. ఆ తర్వాత వారం రోజులకు ఆమెను అరెస్ట్ చేసినట్లు ప్రభుత్వం ప్రకటించింది.