Moon | కేప్ కెనావెరాల్, జూలై 15: చంద్రుడిపై ఒక గుహ ఉందని ఇటలీ శాస్త్రవేత్తల బృందం నిర్ధారించింది. భవిష్యత్తులో ఉపగ్రహంపైకి పంపే వ్యోమగాములకు దీనిని షెల్టర్గా వాడొచ్చునని వెల్లడించింది. అమెరికా అంతరిక్ష పరిశోధన సంస్థ ‘నాసా’ 1969లో ప్రయోగించిన ‘అపోలో-11’.. చంద్రుడిపై దిగిన ప్రదేశానికి సమీపంలోనే ఈ గుహ ఉందని శాస్త్రవేత్తలు వెల్లడించారు.
చంద్రుడిపై ‘సీ ఆఫ్ ట్రాంక్విలిటీ’ అనే ప్రదేశానికి 400 కిలోమీటర్ల దూరంలో గొయ్యి మాదిరి ఓ గుహ ఉందని, భవిష్యత్తులో అక్కడికి వెళ్లే వందలాది మంది వ్యోమగాములు అందులో ఆశ్రయం పొందవచ్చునని సైంటిస్టులు విశ్వసిస్తున్నారు. లావా ట్యూబ్స్తో 200కుపైగా గొయ్యి మాదిరి ఉండే గుహలు ఏర్పడ్డాయని గుర్తించారు. చంద్రుడిపై నాసా లూనార్ ఆర్బిటర్ రాడార్ డాటాను విశ్లేషించిన సైంటిస్టులు, భూమిపై ఏర్పడ్డ లావా ట్యూబ్స్ (గుహలు)తో వాటిని పోల్చారు.