మాస్కో, జూన్ 24: రష్యాలో ఉగ్రవాదులు దారుణానికి ఒడిగట్టారు. ప్రార్థనా స్థలాలు, చర్చిలు, పోలీసు అధికారులే లక్ష్యంగా చేసుకొని తుపాకీ కాల్పులకు తెగబడ్డారు. ఆదివారం డాగేస్థాన్లో సాయుధలైన దుండగులు విచక్షణారహితంగా కాల్పులు జరపటంతో, 15 మంది పోలీసు అధికారులు సహా, సాధారణ పౌరులు, చర్చి ఫాదర్ మరణించారని రాష్ట్ర గవర్నర్ సెర్జీ మిలికోవ్ ఒక ప్రకటన విడుదల చేశారు.
డాగెస్తాన్ రాజధాని మఖచికల, డెర్బెంట్ నగరాల్లో చర్చిలు, పోలీస్ పోస్ట్లపై దుండగులు ఏకకాలంలో దాడులకు దిగినట్టు అధికారులు తెలిపారు. దాడి.. ఉగ్రవాదుల చర్యగా రష్యా తీవ్రవాద వ్యతిరేక కమిటీ పేర్కొన్నది. వెంటనే అప్రమత్తమైన భద్రతా బలగాలు ఉగ్రవాదుల్ని మట్టుబెట్టేందుకు ప్రత్యేక ఆపరేషన్ చేపట్టాయి. ఆరుగురు ఉగ్రవాదుల్ని హతం చేశాయి.