మాంటెరీ పార్క్: అమెరికాలో మళ్లీ కాల్పుల మోత మోగింది. లాస్ ఏంజెల్స్ సమీపంలోని మాంటెరీ పార్క్లో శుక్రవారం దుండగులు కాల్పులకు తెగబడ్డాడు. చైనీయుల లూనార్ న్యూ ఇయర్ వేడుకలో ఈ విషాదం చోటుచేసుకుంది. కాల్పుల్లో 10 మంది దుర్మరణం చెందారని, మరో 10 మంది గాయపడ్డారని లాస్ ఏంజెల్స్ కౌంటీ అధికారులు తెలిపారు. దాడికి గల కారణాలను పోలీసులు వెల్లడించలేదు. మాంటెరీ పార్క్లో ఎక్కువగా ఏసియన్లే ఉంటారు. అందులోనూ చైనీయులే అధికం. తన రెస్టారెంట్లోకి దూసుకొచ్చిన ముగ్గురు వ్యక్తులు తలుపులు మూసేయమని కోరారని, బయట ఓ వ్యక్తి కాల్పులు జరుపుతున్నట్టు చెప్పారని రెస్టారెంట్ యజమాని సూంగ్ వాన్ చోయ్ వెల్లడించారు.
అమెరికాలో భారతీయుడి హత్య
ఫిలడెల్ఫియా నైరుతి ప్రాంతంలో అతిపెద్ద వాణిజ్య ప్రాంతమైన టకోనిలో భారత సంతతికి చెందిన శిబోరామ్ గ్యాస్ స్టేషన్లోని మినీ మార్టులో విధులు నిర్వహిస్తుండగా ముసుగులు ధరించిన ముగ్గురు మార్టు వెనుక భాగాన్ని పగలగొట్టి లోపలికి ప్రవేశించారు. శిబోరామ్పై కాల్పులు జరిపి నగదుతో పరారయ్యారు.