సిటీబ్యూరో, మే 17 (నమస్తే తెలంగాణ) : సికింద్రాబాద్-తిరుపతి-సికింద్రాబాద్ వందేభారత్ ఎక్స్ప్రెస్లో ఎనిమిది బోగీలు బదులుగా పదహారు బోగీలతో బుధవారం సికింద్రాబాద్ రైల్వే స్టేషన్ నుంచి ప్రారంభించారు. ఈ రెండు రైల్వే స్టేషన్ల మధ్యలో ప్రయాణికుల సంఖ్య రోజు రోజుకు పెరుగుతున్న నేపథ్యంలో ఈ మేరకు కేంద్ర ప్రభుత్వం నిర్ణయం తీసుకున్నట్లు రైల్వే అధికారులు వెల్లడించారు.
వందేభారత్లో 16 బోగీలు ఏర్పాటు చేయడంతో పాటు ప్రయాణ సమయం 15 నిమిషాలు తగ్గించారు. గతంలో సికింద్రాబాద్-తిరుపతి స్టేషన్ల మధ్యలో ప్రయాణం చేయడానికి 8.30 గంటల సమయం పట్టేది. కానీ రైల్వే బోర్డు తీసుకున్న నిర్ణయం ప్రకారం బుధవారం నుంచి ప్రయాణ సమయం 8.15 గంటలకు తగ్గిందని అధికారులు తెలిపారు.