సిటీబ్యూరో, జూలై 17 (నమస్తే తెలంగాణ): హైదరాబాద్ మెట్రో రైలు ప్రాజెక్టులో రవాణా ఆధారిత అభివృద్ధి (ట్రాన్సిట్ ఓరియెంటెడ్ డెవలప్మెంట్-టీవోడీ)కి ప్రాధాన్యత లేకుండా పోతోంది. ముఖ్యంగా మెట్రో రైళ్లలోనే ప్రయాణం చేస్తూ ఆయా స్టేషన్లలో షాపింగ్ చేసేలా ప్రత్యేకంగా వాణిజ్య స్థలాలను ప్రతి మెట్రోస్టేషన్లోనూ నిర్మించారు.
ప్రతి రోజూ 5 లక్షల మంది నగర వాసులు మెట్రో రైళ్లలో ప్రయాణం చేస్తున్నా.. వారికి అవసరమైన షాపింగ్ సెంటర్లను స్టేషన్లలో అందుబాటులోకి తీసుకురావడం లేదు. కేవలం 4-5 మెట్రో స్టేషన్లు మినహాయిస్తే మరెక్కడా షాపింగ్ సెంటర్ల జాడ కనిపించడం లేదు. కేవలం అమీర్పేటలోనే వ్యాపార కార్యకలాపాలు కొంతమేర అనుకున్న స్థాయిలో ఉన్నాయి.
ఇక ప్రారంభ మెట్రో స్టేషన్లైన ఎల్బీనగర్, మియాపూర్, జేఎన్టీయూ, నాగోల్, రాయదుర్గం,హైటెక్ సిటీ వంటి స్టేషన్లలో వ్యాపారాలు ఏర్పాటు చేసిన వారు ఎక్కువ కాలం వాటిని నిర్వహించలేకపోతున్నట్లు సమాచారం. స్టేషన్లలో ఉన్న వాణిజ్య స్థలాలను అద్దెకు తీసుకోవాలంటే చదరపు అడుగుకు రూ.80 నుంచి రూ.100ల వరకు కోట్ చేస్తున్నారు. ఈ స్థాయిలో వాణిజ్య స్థలాల ధరలు ఉంటే.. తాము ఎలా వ్యాపారాలు చేస్తామని నిర్వాహకులు వాపోతున్నారు.
వర్ష సూచన
సిటీబ్యూరో, జూలై 17 (నమస్తే తెలంగాణ): బంగాళాఖాతంలో ఏర్పడిన అల్పపీడనానికి తోడు చురుకుగా కదులుతున్న రుతుపవనాల ప్రభావంతో రాగల రెండు రోజులు గ్రేటర్లోని పలు చోట్ల తేలికపాటి నుంచి మోస్తరు, మరికొన్ని చోట్ల మోస్తరు నుంచి తేలికపాటి వానలు కురిసే అవకాశాలున్నట్లు హైదరాబాద్ వాతావరణ కేంద్రం అధికారులు వెల్లడించారు. కాగా, అల్పపీడనం ప్రభావంతో గ్రేటర్లోని లింగంపల్లి, రామచంద్రాపురం, చందానగర్, గచ్చిబౌలి తదితర ప్రాంతాల్లో తేలికపాటి జల్లులు కురిశాయి.