సిటీబ్యూరో, జూలై 20 ( నమస్తే తెలంగాణ )/బేగంపేట : సికింద్రాబాద్ ఉజ్జయిని మహంకాళి బోనాల జాతరకు అన్ని ఏర్పాట్లు పూర్తిచేసినట్లు అధికారులు తెలిపారు. భక్తులకు ఎటువంటి ఇబ్బందులు తలెత్తకుండా చర్యలు తీసుకున్నామన్నారు. అమ్మవారికి బోనాలు సమర్పించే మహిళల కోసం ప్రత్యేకంగా రెండు క్యూలైన్లు ఏర్పాటు చేసినట్లు చెప్పారు.
అలాగే వీఐపీలకు ఒకటి.. సాధారణ భక్తులకు మూడు క్యూలైన్లు ఏర్పాటు చేశామన్నారు. ఇదిలా ఉంటే జాతరకు వచ్చే భక్తుల రాకపోకలకు ఆర్టీసీ 175 ప్రత్యేక బస్సులను నడుపుతున్నది. అయితే ఏదైనా కారణంతో సర్వీసులు అందుబాటులో ఉండకపోతే భక్తులు 9959226154, 9959226160 నంబర్లను సంప్రదిస్తే తక్షణమే బస్సులు ఏర్పాటు చేస్తామని ఆర్టీసీ అధికారులు తెలిపారు. కాగా, ఆదివారం బోనాలు, సోమవారం రంగం (భవిష్యవాణి) అంబారీ ఊరేగింపు, మహా హారతి ఉంటుంది.
మహంకాళి బోనాల జాతర ఉత్సవాల ఏర్పాట్లను శనివారం మంత్రి పొన్నం ప్రభాకర్ పరిశీలించారు. ఈ క్రమంలో దేవాలయంలో అమ్మవారికి మంత్రి పొన్నం ప్రభాకర్, యూఎస్ కాన్సులెట్ జనరల్ జెన్నిఫర్ ఎ. లార్సన్ ప్రత్యేక పూజలు చేశారు. యూఎస్ కాన్సులెట్ జనరల్ జెన్నిఫర్ లార్సన్ మహంకాళికి బోనం సమర్పించారు.