సిటీబ్యూరో, జూలై 17 (నమస్తే తెలంగాణ)/బేగంపేట: ఉజ్జయిని మహంకాళి దేవాలయంలో ఈనెల 21న జరిగే బోనాలు, 22న రంగం (భవిష్యవాణి), మహాహారతి కార్యక్రమాలు ప్రశాంతంగా జరిగేలా భద్రతా చర్యలు చేపట్టాలని అధికారులను కలెక్టర్ అనుదీప్ దురిశెట్టి ఆదేశించారు. సికింద్రాబాద్ ఉజ్జయిని మహంకాళి దేవాలయాన్ని ఆయన బుధవారం సందర్శించారు. ఈ సందర్భంగా కలెక్టర్ మాట్లాడుతూ.. మహంకాళి జాతరకు సంబంధించిన పనులన్నీ వేగవంతంగా పూర్తి చేయాలన్నారు.
ఎలాంటి అవాంఛనీయ సంఘటనలు జరగకుండా పోలీసు శాఖ ప్రత్యేక దృష్టి సారించాలని ఆదేశించారు. జాతరలో విద్యుత్ అంతరాయం ఉండకుండా చూడాలన్నారు. మున్సిపాలిటీ దేవస్థానం పరిసరాలు పరిశుభ్రంగా ఉండేలా అధికారులు చర్యలు చేపట్టాలన్నారు. ఈ కార్యక్రమంలో సికింద్రాబాద్ ఆర్డీఓ దశరత్ సింగ్ తదితరులు పాల్గొన్నారు.