Rangareddy | రంగారెడ్డి : మద్యానికి బానిసై నిత్యం కుటుంబ సభ్యులను వేధిస్తోన్న ఓ తండ్రిని, అడ్డుకునేందుకు ప్రయత్నించిన బంధువును ఓ యువకుడు అత్యంత దారుణంగా హత్య చేశాడు. మైలార్దేవ్పల్లి బాబుల్ రెడ్డి నగర్లో చోటుచేసుకున్న ఈ జంట హత్యలు స్థానికంగా కలకలం రేపాయి.
వివరాల్లోకి వెళ్తే.. బాబుల్ రెడ్డి నగర్కు చెందిన లక్ష్మీనారాయణ మద్యానికి బానిస అయ్యాడు. మద్యం సేవించిన అనంతరం భార్యాపిల్లలను వేధింపులకు గురి చేసేవాడు. కొన్ని రోజుల క్రితం సొంతింటిని కూడా అమ్మానికి పెట్టారు. ఇల్లు అమ్మితే వచ్చే నగదులో తనకు రూ. 20 లక్షలు ఇవ్వాలని భార్యతో శనివారం సాయంత్రం గొడవకు దిగాడు లక్ష్మీనారాయణ. భార్య ఒప్పుకోకపోవడంతో ఆమెపై దాడి చేశాడు.
దాడి నుంచి తల్లిని కాపాడుకునేందుకు ప్రయత్నించిన కుమారుడు రాకేశ్పైనా కూడా లక్ష్మీనారాయణ దాడికి దిగాడు. డబ్బుల కోసం అమ్మను కొడతావా అంటూ.. తండ్రిని ఇంట్లో నుంచి బయటకు లాక్కొచ్చాడు. ఆ తర్వాత ఇనుపరాడ్డుతో దాడి చేశాడు. తీవ్రంగా గాయపడిన లక్ష్మీనారాయణకు సాయం చేసేందుకు వచ్చిన బంధువుపైనా కూడా రాకేశ్ దాడి చేసి తీవ్రంగా గాయపరిచాడు.
దీంతో లక్ష్మీనారాయణ అక్కడికక్కడే ప్రాణాలు కోల్పోగా, బంధువు ఆస్పత్రిలో చికిత్స పొందుతూ మృతి చెందాడు. తన తండ్రి నిత్యం మద్యం సేవించి వేధించేవాడని కూతురు ఆమని తెలిపింది. జంట హత్యలపై కేసు నమోదు చేసుకున్న పోలీసులు దర్యాప్తు చేపట్టారు. నిందితుడు రాకేశ్ను అదుపులోకి తీసుకుని విచారణ చేస్తున్నారు.