సిటీబ్యూరో, జూన్ 11 (నమస్తే తెలంగాణ) : జలమండలిలో సమూల ప్రక్షాళనపై ఎండీ సుదర్శన్ రెడ్డి దృష్టి సారించారు. ఈ మేరకు జీపీఈ (జనరల్ పర్పస్ ఎంప్లాయీ) మొదలుకొని డైరెక్టర్ల వరకు బదిలీలు జరిపేందుకు కసరత్తు ప్రారంభించారు. ఐదేళ్లుగా ఒకే స్థానంలో కొనసాగుతున్న వారికి తొలుత స్థానం చలనం ఉంటుంది. ప్రధానంగా అవినీతి ఆరోపణలు, వివాదాస్పద అధికారులు, ఐదేళ్లు పైబడి ఒకే స్థానంలో ఉన్న వారిని కచ్చితంగా ఇతర చోట్లకు మార్చనున్నారు. కొన్ని డివిజన్లలో ప్రజాప్రతినిధుల అండతో ఇంజినీర్లు (డీజీఎం, జీఎం) స్థాయిలో ఏండ్ల తరబడి కొనసాగుతున్నారు. అయితే అటు బదిలీల జాబితా సిద్ధమవుతుందో లేదో అప్పుడే కొందరు పైరవీలకు తెర లేపినట్లు చర్చ జరుగుతున్నది. ముఖ్యంగా శివారు ప్రాంతాల్లో ఉన్న డివిజన్లో ఉన్న జీఎం, డీజీఎంలు పైరవీలతో యథావిధిగా కొనసాగేలా ప్రయత్నాలు చేస్తున్నారు. ఈ క్రమంలో మెయింటెనెన్స్ విభాగంలో ఉండే కొందరు ఇంజినీర్లు ప్రాజెక్టు విభాగంలోకి వెళ్లేందుకు ప్రయత్నాలు చేసుకుంటున్నట్లు ఉద్యోగుల్లో చర్చ జరుగుతున్నది. మొత్తంగా బదిలీల ప్రక్రియ పారదర్శకంగా జరుగుతుందా? లేదంటే పైరవీల జాతర నడుస్తుందో వేచి చూడాల్సిందే.