Cyber Crime | సిటీబ్యూరో, జూలై 21 (నమస్తే తెలంగాణ): సైబర్ నేరాలు పెరిగిపోతున్నాయి. అమాయకులను మోసం చేసి..వివిధ రకాలుగా నేరస్తులు కోట్లు దోచేస్తున్నారు. దీంతో రోజుకు పదికిపైగా కేసులు నమోదవుతున్నాయి. అయితే 90 శాతం వరకు అసలు నిందితులు పోలీసులకు చిక్కడం లేదు. విదేశాల్లో ఉంటూ..నేరాలకు పాల్పడుతున్నారనే మాట పోలీసులు చెబుతున్నారు. అసలు నేరస్తులు దొరకడం లేదు.. ఏం చేస్తాం.. కేసు మూసేద్దామంటూ.. పోలీసులు పాత కేసులను క్లోజ్ చేసుకుంటున్నారు.
ఆధారాలు లభించకపోవడంతో..
బాధితుడు ఇక్కడ ఉండి నేరస్తుడు ఎక్కడో ఉంటూ మోసాలకు పాల్పడుతూ..ఆర్థికంగా సామాన్యులను సైబర్నేరగాళ్లు దోచేస్తున్నారు. పోలీసులు నిందితుల సెల్ఫోన్, బ్యాంకు ఆధారం ఉంటేనే వాళ్లను పట్టుకోవడం కోసం ప్రయత్నిస్తుంటారు. ఈ ఆధారాలు లేకపోతే ఆ కేసు పక్కన పడిపోతుంది. కొన్ని కేసుల్లో కేవలం బ్యాంకు ఖాతాదారుడిని పట్టుకొచ్చి తాము సైబర్నేరాన్ని ఛేదించామని చెప్పుకొంటున్నారు. ఆర్థికపరమైన మోసాలకు సంబంధించిన సైబర్నేరాల్లో చాలా వరకు కేసుల్లో అసలు నిందితులు పోలీసులకు చిక్కడం లేదు. విదేశాల్లో ఉంటూ నిందితులు నేరాలకు పాల్పడుతున్నారనే మాట పోలీసులు చెబుతున్నారు. దీనికి తోడు ప్రతిరోజూ ట్రై పోలీస్ కమిషనరేట్లలోని సైబర్ క్రైమ్ ఠాణాల్లో 10కి పైగా కేసులు నమోదవుతున్నాయి.