బేగంపేట్ నవంబర్ 28: భారీ మెజార్టీతో గెలిచి హ్యాట్రిక్ సాధిస్తానని సనత్నగర్ నియోజకవర్గం బీఆర్ఎస్ పార్టీ అభ్యర్థి మంత్రి తలసాని శ్రీనివాస్ యాదవ్ అన్నారు. నియోజకవర్గం పరిధిలోని వివిధ ప్రాంతాల్లో ఆయన మంగళవారం భారీ బైక్ ర్యాలీ నిర్వహించారు. పద్మారావునగర్ బీఆర్ఎస్ పార్టీ కార్యాలయం నుంచి ఈ ర్యాలీని ప్రారంభించారు. ముషీరాబాద్, కృష్ణానగర్ కాలనీ, గాంధీనగర్ పోలీస్స్టేషన్, జబ్బార్ కాంప్లెక్స్, సిటీలైట్ హోటల్, మోండా మార్కెట్, మహంకాళి టెంపుల్, మినిస్టర్ రోడ్డు, రసూల్పుర జంక్షన్, పాటిగడ్డ, ప్రకాశ్నగర్, బేగంపేట్, గ్రీన్ పార్కు హోటల్, కనకదుర్గ దేవాలయం, సత్యం థియేటర్, ఎస్ఆర్ నగర్ కమ్యూనిటీ హాల్, బల్కంపేట్ టెంపుల్, ఫతేనగర్ బ్రిడ్జి సనత్నగర్ బస్టాప్, జెక్ కాలనీ వరకు ఈ ర్యాలీ కొనసాగింది.
సుమారు 5 కిలో మీటర్ల మేర పార్టీ శ్రేణులు బైక్లతో ఈ ర్యాలీలో పాల్గొన్నారు. మంత్రి తలసాని జీపు ఓపెన్ టాప్ ప్రచార రథంపై నిల్చొని ప్రజలకు అభివాదం చేశారు. ఈ సందర్భంగా ఆయన మాట్లాడుతూ, అభివృద్ధిలో వెనక బడిన సనత్నగర్ నియోజకవర్గాన్ని తొమ్మిదిన్నరేండ్ల కాలంలో అనేక అభివృద్ధి కార్యక్రమాలు చేపట్టామని చెప్పారు. అధ్వాహ్నంగా ఉన్న సీసీ రోడ్లను అభివృద్ధి చేసినట్టు తెలిపారు. డ్రైనేజీ వ్యవస్థను మెరుగు పరిచిన విషయాలను చెప్పారు.