సిటీబ్యూరో, మే 31 (నమస్తే తెలంగాణ) : సరికొత్త ఆవిష్కరణలను, స్టార్టప్లను ప్రోత్సహించడమే లక్ష్యంగా టీ -హబ్(T- Hub) కార్యకలాపాలు నిర్వహిస్తున్నది. తాజాగా ఇండియా స్టార్టప్ సాహస యాత్రను దేశంలోని 11 నగరాల్లో నిర్వహించేందుకు ప్రణాళికను సిద్దం చేసింది. ఇందులో భాగంగా జూన్ 6వ తేదీన చంఢీఘర్లో (Chandigarh) ఇండియా ఇన్నోవేషన్ యాత్రను(India Innovation Yatra) నిర్వహించనున్నారు.
ఇప్పటికే కోయంబత్తూరు, మంగళూరు నగరాల్లో నిర్వహించారు. దశల వారీగా దేశంలోని ఇతర ప్రధాన నగరాల్లోనూ నిర్వహించేలా ప్రణాళికను సిద్ధం చేశామని టీ-హబ్ సీఈఓ ఎం.ఎస్.రావు తెలిపారు. తెలంగాణ రాష్ట్రంలోనే కాకుండా దేశ వ్యాప్తంగా ఉన్న ఔత్సాహిక అంత్రపెన్యూర్స్ నూతన ఆవిష్కరణలు చేయడంలో ప్రోత్సహించేందుకు టీహబ్ ఈ కార్యక్రమాన్ని చేపట్టిందని ఆయన తెలిపారు.