Private Colleges | ఇంటర్ సెకెండ్ ఇయర్ చదువుతున్న ఓ అమ్మాయి.. తార్నాకలో పేరుగాంచిన ఓ కాలేజీలో ఎంపీసీ అభ్యసిస్తున్నది. ఫీజులో 80 శాతం చెల్లించింది. మరో 20 శాతం ఫీజు రెండు వారాల్లో చెల్లిస్తామని పేరెంట్స్ యాజమాన్యానికి తెలిపారు. కానీ రేపే ఫీజు తేవాలంటూ.. అందరి ముందు ఆ అమ్మాయిని క్లాస్ బయటకు పంపించారు. గంట సేపు క్లాస్లోకి రానివ్వకుండా బయటనే నిల్చోబెట్టారు.
హైదరాబాద్లో 395 ఇంటర్ కాలేజీలు ఉన్నాయి. ఇందులో 275 ప్రైవేటు కాలేజీలు ఉన్నాయి. నగర శివార్లలో పుట్టగొడుగుల్లా వందలాది కాలేజీలు వెలిశాయి. చీకటి గదుల్లో, పురాతన భవనాలను సైతం అద్దెకు తీసుకొని కాలేజీలు నడిపిస్తున్నారు. ఉన్నతాధికారుల దృష్టికి తీసుకెళ్లినప్పటికీ ఫలితం ఉండటం లేదని విద్యానిపుణులు వాపోతున్నారు.
సిటీబ్యూరో, జూలై 12 ( నమస్తే తెలంగాణ): కాలేజీ బెల్ మోగి.. తరగతి గదిలోకి అడుగుపెట్టగానే మొదట వినబడే మాట.. ‘ఫీజు చెల్లించారా? లేదా?’ ఈ ప్రశ్నకు చెల్లించాం అనే సమాధానం రాకపోతే ఆ విద్యార్థికి క్లాస్లోకి అనుమతి ఉండదు. అలా అని ఇంటికీ పంపించరు. తరగతి గది బయటనే గంటల తరబడి విద్యార్థులను నిల్చోబెట్టి అవమానిస్తున్నారు. హైదరాబాద్లో కాలేజీల ఫీజుల దందా ఆకాశన్నంటుతున్నది. వేలం పాటలో సీట్లను అమ్ముకున్నట్టు విక్రయించేశారు. ఇప్పటికే కోట్ల రూపాయలు లాగేశారు. ఇవి చాలవన్నట్టు యూనిఫాం, సిక్, ఏసీ, సెక్లన్-ఏ, కోర్సు తదితర పేర్లతో పేరెంట్స్ నుంచి వేలాది రూపాయలు గుంజుతున్నారు. ఈ ఫీజుల దందాపై జిల్లా ఇంటర్ బోర్డు అధికారులు ఏ మాత్రం దృష్టి సారించడం లేదని విమర్శలు వెల్లువెత్తుతున్నాయి.
ఫీజుల వసూళ్లతో విద్యార్థులను ఇబ్బంది పెట్టవద్దు. నిబంధనలకు విరుద్ధంగా ఫీజులు వసూలు చేస్తే నోటీసులు పంపిస్తాం. ఆ కాలేజీపై చర్యల కోసం ఉన్నతాధికారులకు రిపోర్ట్ చేస్తాం. ఇప్పటికే కొన్ని కాలేజీలు ఫీజులను వసూలు చేయడం కోసం విద్యార్థులను తరగతి గది బయట నిల్చోబెడుతున్నట్టు ఫిర్యాదులు వచ్చాయి. వాటిపై కఠిన చర్యలు తీసుకుంటాం. అవసరమైతే ఆ కాలేజీ గుర్తింపును రద్దు చేయడానికి సిఫారసు చేస్తాం.