హైదరాబాద్, ఏప్రిల్ 21(నమస్తే తెలంగాణ) : సెంట్రల్ యూనివర్సిటీలో జరిగిన ఘర్షణపై పూర్తిస్థాయి విచారణ జరిపి దాడిచేసిన ఏబీవీపీ కార్యకర్తలపై కఠిన చర్యలు తీసుకోవాలని ఎస్ఎఫ్ఐ తెలంగాణ రాష్ట్ర అధ్యక్ష, కార్యదర్శులు ఆర్.ఎల్.మూర్తి, టి.నాగరాజు డిమాండ్ చేశారు. ఆదివారం హైదరాబాద్లో ఎస్ఎఫ్ఐ కేంద్ర కమిటీ సభ్యులు శివదుర్గారావు, హెచ్సీయూ విద్యార్థి సంఘం అధ్యక్షుడు అతీక్, యూనిట్ కార్యదర్శి కృపాజార్జ్, విద్యార్థులు, దాడిలో గాయపడిన విద్యార్థులు మెహిత్, ఆషిక, ఖాయినీ, ఫైజల్ విలేకరుల సమావేశం నిర్వహించారు. ఈ సందర్భంగా వారు మాట్లాడుతూ ఏప్రిల్ 13వ తేదీ ఎకానామిక్స్ డిపార్మెంట్స్ ఫేర్వెల్ పార్టీ జరుగుతున్న సందర్భంలో ఏబీవీపీకి చెందిన వారు మద్యం మత్తులో అల్లరి చేస్తూ పాటల విషయంలో గొడవ చేస్తుంటే విద్యార్థులు అడ్డుకున్నారన్నారు. దీంతో కోపం పెంచుకున్న ఏబీవీపీ విద్యార్థులు 17వ తేదీన మైనారిటీ వర్గానికి చెందిన ఫైజల్ అనే విద్యార్థిపై విచక్షణా రహితంగా దాడి చేశారన్నారు.
జేఎన్టీయూలో నబీబ్ అదృశ్యమైన ఘటన తెలిసిందే.. అలా నిన్ను అదృశ్యం చేస్తామని బెదిరింపులకు గురి చేశారని మండిపడ్డారు. విద్యార్థినులను సైతం లైంగిక వేదింపులకు గురిచేశారని తెలిపారు. 10మంది విద్యార్థులను తీవ్రంగా గాయపర్చడంతో పాటు వారిని తీసుకెళ్తున్న అంబులెన్స్పై సైతం దాడికి యత్నించారని ఆరోపించారు. ఈ విషయమై పోలీసులకు తెలుపగా.. ఇరు వర్గాల మధ్యన ఘర్షణగా చిత్రీకరిస్తూ బైండోవర్ చేస్తున్నారని వాపోయారు. పోలీసులు నిష్పక్షపాత విచారణ జరిపి దాడి చేసిన దోషులను శిక్షించాలని డిమాండ్ చేశారు. ఈ కార్యక్రమంలో ఎస్ఎఫ్ఐ రాష్ట్ర కమిటీ సభ్యులు జూనుగరి రమేశ్, హైదరాబాద్ జిల్లా ఉపాధ్యక్షుడు స్టాలిన్, సెంట్రల్ యూనివర్సిటీ విద్యార్థులు పాల్గొన్నారు.