సిటీబ్యూరో, జూన్ 2 (నమస్తే తెలంగాణ) : బంగాళాఖాతంలో ఏర్పడిన ఉపరితల ఆవర్తనం ప్రభావంతో ఆదివారం సాయంత్రం గ్రేటర్లోని పలు చోట్ల ఉరుములు, మెరుపులు, ఈదురు గాలులతో కూడిన వర్షం కురిసింది. నగరానికి ఉత్తరం దిక్కున ఉన్న జీడిమెట్ల, చింతల్, గాజులరామారం, షాపూర్నగర్లో అత్యధికంగా వర్షం కురిసింది. జీడిమెట్ల డివిజన్ పరిధిలోని ఫస్ట్అవెన్యూ కాలనీలో చెట్లతో పాటు విద్యుత్ స్తంభం విరిగిపడింది. సాయంత్రం 4 నుంచి రాత్రి 7 గంటల వరకు విద్యుత్ సరఫరాకు తీవ్ర అంతరాయం కలిగింది. పేట్ బషీరాబాద్ విద్యుత్ అధికారులతో పాటు కుత్బుల్లాపూర్ మున్సిపల్ అధికారులకు ఫోన్లు చేసినా సకాలంలో స్పందించడం లేదని కాలనీవాసులు మండిపడ్డారు.
అరగంట పాటు కురిసిన గాలివాన బీభత్సానికి ఆయా ప్రాంతాల్లోని కాలనీలలో పార్కింగ్ చేసి ఉంచిన వాహనాలపై చెట్ల కొమ్మలు విరిగిపడ్డాయి. పలు వాహనాలు ధ్వంసమయ్యాయి. రాత్రి 9గంటల వరకు జీడిమెట్లలో అత్యధికంగా 4.48 సెం.మీలు, గాయత్రి నగర్, గాజులరామారంలో 3.0 సెం.మీలు, మోండామార్కెట్, కూకట్పల్లి రాజీవ్ గృహకల్ప ప్రాంతాల్లో 2.30సెం.మీలు, సీతాఫల్మండి, కుత్బుల్లాపూర్ ప్రాంతాల్లో 1.7 సెం.మీలు, ముషీరాబాద్, పాటిగడ్డ, పికెట్ ప్రాంతాల్లో 1.5 సెం.మీలు, ఉప్పల్, చిలుకానగర్ ప్రాంతాల్లో 1.0 సెం.మీల చొప్పున వర్షపాతం నమోదైనట్లు టీఎస్డీపీఎస్ అధికారులు వెల్లడించారు. రాగల మరో రెండు రోజులు గ్రేటర్లోని పలు చోట్ల ఉరుములు, మెరుపులు, ఈదురు గాలులతో కూడిన మోస్తరు నుంచి భారీ వర్షం కురిసే అవకాశం ఉన్నట్లు హైదరాబాద్ వాతావరణ కేంద్రం అధికారులు వెల్లడించారు. ఈ నేపథ్యంలో గ్రేటర్కు ఎల్లో అలర్ట్ హెచ్చరికలు జారీచేశారు.