సిటీబ్యూరో, జూన్ 4 (నమస్తే తెలంగాణ): భారీ వర్షాలతో ముంపు సమస్యలే కాదు.. గ్రేటర్ హైదరాబాద్ పరిధిలో విద్యుత్ సరఫరాలో అంతరాయాలు ఎక్కువగానే ఉంటాయి. ఈ నేపథ్యంలో మెరుగైన విద్యుత్ సరఫరాను అందించేందుకు దక్షిణ తెలంగాణ విద్యుత్ పంపిణీ సంస్థ ప్రత్యేకంగా చర్యలు తీసుకుంటోంది. గ్రేటర్ పరిధిలో కురుస్తున్న వర్షాల నేపథ్యంలో విద్యుత్ సరఫరాపై ఉన్నతాధికారులు అప్రమత్తంగా ఉండాలని ఇప్పటికే ఆదేశాలు జారీ చేశారు. మొత్తం 9 సర్కిళ్ల పరిధిలో క్షేత్ర స్థాయిలో ప్రత్యేక బృందాలు పర్యవేక్షణ చేపట్టాలని, ఎక్కడ విద్యుత్ సరఫరాలో అంతరాయం కలిగినా యుద్ధ ప్రాతిపదికన సరఫరాను పునరుద్ధరించాలని సూచించారు. ముఖ్యంగా ఈ వర్షాకాలంలో ఆయా సర్కిల్ కార్యాలయాల్లో ప్రత్యేక కంట్రోల్ రూమ్లను ఏర్పాటు చేసుకొని పగలు, రాత్రి వేళల్లో పర్యవేక్షణ చేయాలన్నారు. ఆయా ప్రాంతాల నుంచి విద్యుత్ సరఫరాపై వస్తున్న ఫిర్యాదులను పరిశీలిస్తూ, వాటిని త్వరితగతిన పునరుద్ధరించేందుకు సిద్ధంగా ఉండాలని సూచనలు చేశారు. వర్షాలు కురిసే సమయంలో విద్యుత్ పర్యవేక్షణ కోసం స్కాడాలోనూ ప్రత్యేక కంట్రోల్ రూమ్ను ఏర్పాటు చేసి అంతరాయం ఎక్కడ ఉందో తెలుసుకొని అక్కడ పునరుద్ధరించేలా అధికార యంత్రాంగం నిరంతరం అప్రమత్తంగా ఉండేలా ఏర్పాట్లు చేస్తున్నారు.