She Teams | సిటీబ్యూరో, జూన్ 9 (నమస్తే తెలంగాణ): రద్దీ, పర్యాటక ప్రాంతాలపై షీ టీమ్స్ దృష్టి పెట్టాయి. ఈ ప్రాంతాల నుంచే ఎక్కువగా ఫిర్యాదులు అందడంతో నిఘాను పెంచాయి. అదేవిధంగా.. బస్టాప్లు, పార్కులు, విద్యా కేంద్రాలు, ఇతర ప్రాంతాల్లో పోకిరీలను రెడ్ హ్యాండెడ్గా పట్టుకుంటున్నారు. విద్యా సంస్థల ప్రారంభంతో షీ టీమ్స్ నిఘాను మరింతగా పెంచాల్సిన అవసరం ఉంటుంది. అయితే, తగిన సిబ్బంది లేకపోవడంతో ఆశించిన మేరకు షీ టీమ్స్ దూకుడు ప్రదర్శించడం లేదనే విమర్శలు కూడా వస్తున్నాయి.
ట్రై పోలీసు కమిషనరేట్ల పరిధిలో ఆకతాయిల ఆట కట్టించేందుకు షీ టీమ్స్ నిఘా పెట్టి రెడ్ హ్యాండ్గా పట్టుకుంటున్నాయి. కుటుంబ సభ్యుల సమక్షంలో ఆకతాయిలకు కౌన్సెలింగ్ నిర్వహిస్తున్నారు. కౌన్సెలింగ్కు తల్లిదండ్రులు కూడా హాజరుకావడంతో కొందరు తల్లిదండ్రులు తమ పిల్లలు చేసిన తప్పు తెలుసుకొని అక్కడే వారిని మందలిస్తున్నారు. కౌన్సెలింగ్తో మారని పోకిరీల నేర తీవ్రతను బట్టి కేసులు నమోదు చేసి కోర్టు ఎదుట హాజరు పరుస్తున్నారు. ఒకటి కంటే ఎక్కువ సార్లు పట్టుబడి.. కేసులు నమోదైన పోకిరీలు జైలుకు వెళ్లేలా చేస్తున్నారు.
రద్దీగా ఉండే ప్రాంతాల్లో తిరుగుతున్న పోకిరీలపై నిఘా పెట్టిన షీ టీమ్స్… ఆకతాయి చేష్టలపై వీడియో చిత్రీకరించి రెడ్ హ్యాండెడ్గా పట్టుకుంటారు. పండుగలు, వేడుకల సమయాల్లో రెడ్ హ్యాండెడ్గా పట్టుబడే వారి సంఖ్య ఎక్కువగా ఉంటుంది. వినాయక నిమజ్జనోత్సవాల సందర్భంగా పోకిరీలు వందల సంఖ్యలో పట్టుబడుతున్నారు. పట్టుబడ్డ అకతాయిల మైండ్సెట్, నేర తీవ్రతను దృష్టిలో పెట్టుకొని కౌన్సెలింగ్ నిర్వహిస్తున్నారు. వేసవి సెలవులు ముగుస్తున్నాయి. విద్యా సంస్థలు తిరిగి ప్రారంభమవుతున్నాయి, బస్టాప్లు, మెట్రో స్టేషన్ల వద్ద రద్దీ ఎక్కువగా ఉంటుంది. దీంతో ఆకతాయిల చేష్టలు పెరిగే అవకాశం ఉంది. విద్యా సంవత్సరం ఆరంభంలోనే షీ టీమ్స్ దూకుడుగా ఉండాల్సిన అవసరం ఉంటుంది. షీటీమ్స్ దూకుడు పెంచడంతో ఆకతాయిల్లో భయం ఉంటుందని ప్రజలు చెబుతున్నారు. అయితే, షీ టీమ్స్కు తగిన సిబ్బంది కూడా లేకపోవడంతో ఆశించిన స్థాయిలో ఫలితాలు సాధించలేకపోతున్నారని తెలిసింది.
షీ టీమ్స్కు నేరుగా వచ్చి ఫిర్యాదు చేసే వారితో పాటు వాట్సాప్, ఈ మెయిల్స్, ఫోన్ ద్వారా కూడా ఫిర్యాదు చేస్తున్నారు. ప్రతి ఫిర్యాదుపై షీ టీమ్స్ వెంటనే చర్యలు చేపడుతోంది. చాలా రోజులుగా ఇతరుల నుంచి వేధింపులు ఎదుర్కొంటున్న వారు నేరుగా వచ్చి ఫిర్యాదు చేస్తున్నారు. బాధితుల నుంచి వస్తున్న ఫిర్యాదులపై వెంటనే స్పందిస్తున్న షీటీమ్స్ అధికారులు సత్వర చర్యలు చేపడుతున్నారు. బాధితులకు ధైర్యం నింపి, నేరగాళ్లపై చర్యలు తీసుకుంటున్నారు. బాధితులు ధైర్యంగా షీ టీమ్స్కు ఫిర్యాదులు చేయాలని పోలీసులు సూచిస్తున్నారు. వేధింపులపై మౌనం వీడాలని.. షీ టీమ్స్ మీకు అండగా ఉంటాయి. అంటూ భరోసా ఇస్తున్నాయి.