సిటీబ్యూరో: నగరంలో ట్రాఫిక్ కష్టాలను కండ్లకు కడుతూ.. ‘నమస్తే’లో ప్రచురితమైన ‘నగరం ట్రాఫిక్ నరకం’ కథనానికి విశేష స్పందన వచ్చింది. పలువురు సోషల్ మీడియా వేదికగా తమ అనుభవాలను పంచుకున్నారు. ఎక్స్, వాట్సాప్, ఫేస్బుక్, ఇన్స్టా వేదికలపై పలువురు నెటిజన్లు నగరంలోని తాము ఎదుర్కొన్న ట్రాఫిక్ నరకంపై అభిప్రాయాలు వెల్లడించారు.
ఇలాంటి ట్రాఫిక్ కష్టాలు.. గతంలో లేవని సౌజన్య అనే ఓ నెటిజన్ తన అభిప్రాయాన్ని పంచుకోగా, హబ్సిగూడ, సంగీత్ జంక్షన్, రసూల్ఫుర జంక్షన్, జూబ్లీహిల్స్, గచ్చిబౌలి, నానక్ రాంగూడ ఔటర్, హైటెక్ సిటీ, నిజాంపేట్ జంక్షన్, ఎల్బీనగర్ చౌరస్తాలో వాహనదారులు ఎదుర్కొంటున్న ట్రాఫిక్ కష్టాలను కండ్లకు కట్టినట్లు చూపించిన ‘నమస్తే’ కథనం పోలీసులకు ఓ సూచనగా పనిచేస్తుందని మరో నెటిజన్ పేర్కొన్నారు. కొన్ని సిగ్నిళ్ల వద్ద పర్యవేక్షణ సరిగా లేకపోవడంతో వాహనదారులు 5 నుంచి పది నిమిషాల పాటు సిగ్నల్ దాటేందుకు ఎదురుచూడాల్సిన పరిస్థితి వస్తున్నదని ఐటీ ఉద్యోగి శరత్ తెలిపారు.