మియాపూర్ , జూన్ 23 : మియాపూర్ స్టాలిన్ నగర్లోని సర్వే నం. 100, 101లో ఉన్న ప్రభుత్వ భూమిలోకి ఎవరు రావొద్దని , ఆక్రమణలకు యత్నిస్తే చర్యలు తప్పవని సైబరాబాద్ సీపీ అవినాష్ మహంతి హెచ్చరించారు. ఇండ్ల స్థలాలివ్వాలంటూ శనివారం వేల సంఖ్యలో ప్రజలు ప్రభుత్వ భూమి వద్దకు చేరుకున్నారు. వారికి నచ్చజెప్పేందుకు యత్నించిన పోలీసులపై రాళ్ల దాడి చేయడంతో అధికారులు ఈ ఘటనను సీరియస్గా తీసుకున్నారు. ఈ స్థలాన్ని సైబరాబాద్ సీపీ అవినాష్ మహంతి ఆదివారం పరిశీలించి మాట్లాడారు. ఇండ్ల స్థలాల కోసం విన్నవించుకునే ప్రజలు తగిన విధానాన్ని పాటించాలన్నారు. ఆక్రమణలకు పాల్పడటం చట్ట వ్యతిరేకమని హెచ్చరించారు. సర్వే నం.100 , 101లోని ప్రభుత్వ భూమిలోకి రావడాన్ని నిషేధించినట్లు, నిబంధనలకు విరుద్ధంగా చొరబడితే చర్యలు తప్పవని సీపీ స్పష్టం చేశారు. ఈ స్థలం పరిసరాల్లో బందోబస్తుతో పాటు, 144 సెక్షన్ అమలులో ఉందని సూచించారు. అయితే పోలీసులపై రాళ్ల దాడికి పాల్పడ్డ వారిని గుర్తించి చర్యలు తీసుకోనున్నట్లు తెలిపారు. శనివారం రాత్రి వరకు ఆ స్థలం వద్దే ఉన్న ప్రజలు.. ఆదివారం వెళ్లిపోయారు. సీపీ మహంతి వెంట డీసీపీ డాక్టర్ వినీత్, అదనపు డీసీపీ జయరాం, మియాపూర్ ఏసీపీ నర్సింగరావు, సీఐ దుర్గారామలింగ ప్రసాద్, శేరిలింగంపల్లి తహసీల్దార్ వెంకారెడ్డి , ఎస్టేట్ అధికారి వీరారెడ్డి ఉన్నారు.
మియాపూర్ : మియాపూర్ పరిధిలోని సర్వే నం. 100 , 101 లో ఉన్న ప్రభుత్వ భూములను శేరిలింగంపల్లి డిప్యూటీ కలెక్టర్, తహసీల్దార్ వెంకారెడ్డితో కలిసి రంగారెడ్డి జిల్లా అదనపు కలెక్టర్ భూపాల్రెడ్డి ఆదివారం పరిశీలించారు. ఈ సందర్భంగా ఆ రెండు సర్వే నంబర్లలోని భూములు ప్రభుత్వానివేనని రాష్ట్ర ఉన్నత న్యాయస్థానం గతంలోనే తీర్పునిచ్చిందని పేర్కొన్నారు.