Operation Bulldozer | హైదరాబాద్ సిటీబ్యూరో, జూలై 22 (నమస్తే తెలంగాణ)/ శంషాబాద్ రూరల్: భూ కబ్జా, కిడ్నాప్లకు పాల్పడుతూ ప్రజలను భయభ్రాంతులకు గురిచేస్తున్న దుండగులపై తెలంగాణ పోలీసులు తొలిసారి ‘ఆపరేషన్ బుల్డోజర్’ను ప్రయోగించారు. భూకబ్జాలతో పాటు మారణాయుధాలతో బాధితులను బెదిరింపులకు గురిచేయడం, కిడ్నాప్నకు పాల్పడి ఫామ్హౌస్లలో బంధించటం వంటి ఘోరాలకు పాల్పడుతున్న ఒక ముఠాకు చెందిన 17 మందిని కటకటాల్లోకి నెట్టిన రాజేంద్రనగర్ జోన్ పోలీసులు.. శంషాబాద్లో అసాంఘిక కార్యకలాపాలకు అడ్డాగా మార్చుకున్న వారి ఫామ్హౌస్ను మున్సిపల్, రెవెన్యూ అధికారులతో కలిసి నేలమట్టం చేశారు. వివరాల్లోకి వెళితే.. ఫక్రుద్దీన్, సుజాత్అలీ 20-30 మందితో కలిసి ముఠాగా ఏర్పడ్డారు. వీరు రాజేంద్రనగర్ మండలంతో పాటు దాని పరసర ప్రాంతాల్లో ఖరీదైన ఖాళీ స్థలాలను కబ్జాచేస్తారు.
విదేశాల్లో ఉన్న ఓనర్లు, వృద్ధాప్యంలో ఉన్న ఓనర్లు, వెనకాముందు ఎవరూ లేని బలహీనులను లక్ష్యంగా చేసుకుని కబ్జాలకు పాల్పడుతుంటారు. ఇలాంటివారి ఖాళీ స్థలాలను కొనుగోలు చేసినట్టు నకిలీ పత్రాలు సృష్టిస్తారు. కొన్ని సందర్భాల్లో సర్వే నంబర్లను తారుమారు చేసి స్థలాలను కబ్జా చేస్తారు. ఇటీవల గండిపేటలో ఒక వైద్యుడి స్థలాన్ని కబ్జాచేసి బెదిరింపులకు పాల్పడ్డారు. ఓ స్థలం వివాదంలో ఎమ్మార్పీఎస్ నేత నరేందర్ను కిడ్నాప్ చేసి, శంషాబాద్లోని ఫామ్హౌస్లో బంధించి, చిత్రహింసలకు గురిచేశారు. అత్తాపూర్లోని అక్బర్హిల్స్లో ఉన్న 500 గజాల స్థలాన్ని కబ్జాచేసి, ఆ స్థలంలోకి ఎవరూ రాకుండా మారణాయుధాలు, వేట కుక్కలతో తిష్టవేశారు. బాధితుల ఫిర్యాదుతో రాజేంద్రనగర్ డీసీపీ చింతమనేని శ్రీనివాస్.. స్థానిక పోలీసులు, ఎస్వోటీ బృందాలను రంగంలోకి దించి ప్రధాన నిందితుడు సుజాత్ అలీని ఇటీవల ముంబైలో అరెస్టు చేశారు. అతడితో పాటు ఇప్పటి వరకు 17 మందిని కటకటాల్లోకి నెట్టారు. ఈ రౌడీమూక శంషాబాద్ ధర్మగిరి దేవాలయం దగ్గర, సర్వే నంబర్ 103/21లో ఎలాంటి అనుమతులు లేకుండా నిర్మించిన ఫామ్హౌస్ కేంద్రంగా కబ్జాలు, బలవంతపు సెటిల్మెంట్లు, కిడ్నాప్లు చేస్తున్నట్టు విచారణలో తేలటంతో.. సోమవారం ఆ ఫామ్హౌజ్ను బుల్డోజర్తో నేలమట్టం చేశారు. ఆ ఫామ్హౌజ్ నిర్మాణానికి అనుమతులు లేవని, స్థలం కూడా అక్షయ్ సత్సేనా అనే వ్యక్తికి చెందినదని.. దాన్ని కబ్జా చేసి నిర్మాణం చేపట్టారని మున్సిపల్ కమిషనర్ సుమన్రావు తెలిపారు. తమ స్థలాన్ని కబ్జా చేసి నిర్మించారన్న బాధితుల ఫిర్యాదుతో శంషాబాద్ పోలీసుల సహకారంతో దాన్ని కూల్చివేశామని పేర్కొన్నారు.