చిక్కడపల్లి, మే 31 : రాష్ట్రంలో ప్రైవేట్, కార్పొరేటర్ విద్యాసంస్థల్లో ఫీజుల దందా నియంత్రణ కోసం ప్రత్యేక చట్టం తెవాలని ఎమ్మెల్సీ నర్సిరెడ్డి అన్నారు. వచ్చే అసెంబ్లీ సమావేశాల్లోనే ఈ చట్టానికి రూపకల్పన చేయాలని కోరారు. భారత విద్యార్థి ఫెడరేషన్(ఎఫ్ఎఫ్ఐ) తెలంగాణ రాష్ట్ర కమిటీ ఆధ్వర్యంలో తెలంగాణ రాష్ట్రంలో కార్పోరేట్, ప్రైవేట్ విద్యాసంస్థల్లో ‘ఫీజుల నియంత్రణ చట్టం- అవశ్యకత’ అనే అంశంపై శుక్రవారం సుందరయ్య విజ్ఞాన కేంద్రంలో రౌండ్ టేబుల్ సమావేశం నిర్వహించారు.
ఈ సమావేశానికి ముఖ్య అతిథిగా ఎ.నర్సిరెడ్డి హాజరై మాట్లాడారు. కాంగ్రెస్ ప్రభుత్వం రాష్ట్రంలో కార్పొరేట్, ప్రైవేట్ విద్యాసంస్థల్లో ఫీజుల నియంత్రణ కోసం వచ్చే అసెంబ్లీ సమావేశాల్లో చట్టం ప్రవేశ పెట్టి ఫీజుల నియంత్రణ చేయాలన్నారు. హైకోర్టు మాజీ న్యాయమూర్తి జస్టిస్ చంద్రకుమార్ మాట్లాడుతూ విద్యలో వ్యాపార ధోరణి ప్రమాదకరమన్నారు. ఎస్ఎఫ్ఐ రాష్ట్ర అధ్యక్షుడు ఆర్.ఎ.మూర్తి అధ్యక్షతన వహించిన ఈ సమావేశంలో ఎస్ఎఫ్ఐ రాష్ట్ర కార్యదర్శి టి.నాగరాజు, ప్రొఫెసర్ తిరుపతిరావు, ఐఎస్యూ జాతీయ అధ్యక్షుడు పి.నాగరాజు, పుట్టా లక్ష్మణ్, మణికంఠ రెడ్డి, రామకృష్ణ, అశోక్ రెడ్డి, పాల్గొన్నారు.