సిటీబ్యూరో ప్రధాన ప్రతినిధి, జూలై 23 (నమస్తే తెలంగాణ) ; సికింద్రాబాద్… మల్కాజిగిరి… చేవెళ్ల… మూడు లోక్సభ స్థానాల్లో బీజేపీ ఎంపీలు ప్రాతినిధ్యం వహిస్తున్నారు. ఇందుకు అదనంగా ముషీరాబాద్కు చెందిన లక్ష్మణ్ రాజ్యసభకు ప్రాతినిధ్యం వహిస్తున్నారు. మరి.. దేశంలోని కీలక మెట్రో నగరాల్లో ఒకటైన హైదరాబాద్ మహా నగరానికి మంగళవారం కేంద్రంలోని బీజేపీ సర్కారు ప్రవేశపెట్టిన కేంద్ర బడ్జెట్లో దక్కింది… ‘గుండుసున్నా!’. ఐదేండ్ల కిందట కేంద్ర నిధులతో ప్రారంభించిన అంబర్పేట, ఉప్పల్ ఫ్లైఓవర్లు మొండి పిల్లర్లతో వెక్కిరిస్తుండగా.. తాజా బడ్జెట్లో ఒక్కటంటే ఒక్క ప్రాజెక్టును సైతం సాధించలేదు.మూడోసారి మోడీ సర్కారు వస్తే నగరానికి అది చేస్తాం.. ఇది చేస్తాం..అంటూ ఇటీవలి పార్లమెంటు ఎన్నికల్లో ఊదరగొట్టిన బీజేపీ నేతలు కేంద్ర మంత్రి పదవితో సరిపెట్టుకొని సిరా ఆరకముందే నగర ఓటర్లను మోసం చేశారు.
సాధారణంగా కేంద్రంలో అధికారమున్న పార్టీ ఎంపీలు ఉంటే ఆ ప్రాంతానికి నిధులు పుష్కలంగా వస్తాయని సామాన్యుడు ఆశిస్తాడు. కానీ మునుపటి లెక్కనే తెలంగాణ… అందునా హైదరాబాద్ మహా నగర పరిధిలోని బీజేపీ ఎంపీలు సామాన్యుడి ఆశల్ని సమాధి చేశారు. గత పది సంవత్సరాల్లో హైదరాబాద్ మహా నగరం దేశంలోని ఇతర మెట్రో నగరాలను వెనక్కి నెట్టి అనేక రంగాల్లో దూసుకుపోయింది. ఇక్కడి మౌలిక వసతుల కల్పనకు జాతీయ, అంతర్జాతీయ ప్రతినిధులు, పారిశ్రామికవేత్తలు, వివిధ రంగాల ప్రముఖులు సైతం ఫిదా అయిన సందర్భాలు అనేకం. ఈ క్రమంలో కేంద్రం నుంచి కూడా నగరాభివృద్ధికి ఆర్థికంగా చేయూత ఉంటే నగర భవిష్యత్తు ఇంకా ఉజ్వలంగా ఉంటుంది. కానీ గత పదేండ్లుగా హైదరాబాద్ మహా నగరాభివృద్ధికి మొండిచెయ్యి చూపిన కేంద్రంలోని మోడీ సర్కారు మరో‘సారీ’ శీతకన్ను ప్రదర్శించింది. మంగళవారం పార్లమెంటులో కేంద్ర ఆర్థిక శాఖ మంత్రి నిర్మలా సీతారామన్ ప్రవేశపెట్టిన బడ్జెట్లో తెలంగాణ పదమే కనిపించకపోగా… హైదరాబాద్ అభివృద్ధి అనేది నల్లపూసగా మారింది.
కీలక ప్రాజెక్టుల విస్మరణ..
హైదరాబాద్ మహా నగరంలో మౌలిక వసతుల కల్పన అనేది కేసీఆర్ ప్రభుత్వ హయాంలో పెద్ద ఎత్తున జరిగింది. ఫ్లైఓవర్లు, ఇతరత్రా నిర్మాణాలను రాష్ట్ర ప్రభుత్వ నిధులతోనే పూర్తి చేశారు. ఈ నేపథ్యంలో కేసీఆర్ ప్రభుత్వ హయాంలో మెట్రో రైలు రెండో దశకు రూ.8500 కోట్లు ఇవ్వాలని అనేకసార్లు అప్పటి పురపాలక, ఐటీ శాఖ మంత్రి కేటీఆర్ కేంద్రాన్ని కోరారు. కానీ కేంద్రం స్పందించలేదు. ఇప్పుడు కాంగ్రెస్ ప్రభుత్వం వచ్చిన తర్వాత అలైన్మెంట్ మార్పులతో రెండో దశను ఏకంగా రూ.20వేల కోట్లతో ప్రతిపాదించింది. కానీ డీపీఆర్ పూర్తి కాకపోవడమో… కేంద్రంలోని మోడీ సర్కారు గత నిర్లక్ష్యాన్నే కొనసాగించడమో… మొత్తానికి కేంద్ర బడ్జెట్లో హైదరాబాద్ మెట్రో రైలు పదమే కనిపించలేదు. దీంతో పాటు ప్రస్తుతం కాంగ్రెస్ ప్రభుత్వం ఫ్లాగ్షిప్ కార్యక్రమంగా చెబుతున్న మూసీ సుందరీకరణ అంచనా వ్యయాన్ని ఏకంగా రూ.లక్షన్నర కోట్లకు పెంచింది. మరి ఇంత పెద్ద మొత్తం అంచనా వ్యయంగా ఉంటే ఢిల్లీకి వెళ్లిన సీఎం రేవంత్తో పాటు మంత్రులు మూసీ సుందరీకరణకు కేంద్రం నుంచి అడిగిన నిధులు పట్టుమని పది శాతం కూడా కాకుండా కేవలం రూ.10వేల కోట్లు అడిగారు. చివరకు ఆ ప్రతిపాదనను సైతం కేంద్రం బుట్టదాఖలు చేసిందనేది తాజా బడ్జెట్తో బట్టబయలైంది.
బీజేపీ ఎంపీలు ఇచ్చే జవాబు?!
మహా నగర పరిధిలోని సికింద్రాబాద్ స్థానం నుంచి గెలుపొందిన కిషన్రెడ్డి కేంద్ర మంత్రి పదవి దక్కించుకున్నారు. చేవెళ్ల నుంచి కొండా విశ్వేశ్వర్రెడ్డి బీజేపీ తరపున గెలుపొందారు. మల్కాజిగిరి నుంచి ఈటల రాజేందర్ కూడా గెలుపొందడంతో నగర పరిధిలోనే బీజేపీ ఎంపీల సంఖ్య మూడుకు చేరింది. వీరితో పాటు ముషీరాబాద్ మాజీ ఎమ్మెల్యే లక్ష్మణ్ రాజ్యసభ సభ్యుడిగా కొనసాగుతున్నారు. ఇలా నలుగురు సభ్యులు ఉన్నప్పటికీ కీలకమైన హైదరాబాద్ అభివృద్ధికి కేంద్రం నుంచి నయాపైసా కూడా తీసుకురాకపోవడంపై నగరవాసులు తీవ్ర ఆగ్రహం వ్యక్తం చేస్తున్నారు. చివరకు కిషన్రెడ్డి రాష్ట్ర పార్టీ అధ్యక్షుడిగా ఉండటం తెలంగాణ, హైదరాబాద్ నగరానికి అదనపు ప్రయోజనాన్ని చేకూర్చాలేగానీ కేవలం ఆయనకు మంత్రి పదవి దక్కేందుకు మాత్రమే పరిమితం కావడం ఎంతవరకు సమంజసం అని నగరవాసులు ప్రశ్నిస్తున్నారు.