సిటీబ్యూరో, మార్చి 20 (నమస్తే తెలంగాణ): నిషేధిత డ్రగ్స్ వాడకం, రవాణాపై ఉక్కుపాదం మోపుతామని రాచకొండ సీపీ తరుణ్ జోషి తెలిపారు. నిషేధిత డ్రగ్స్ కేసుల దర్యాప్తులో నిందితులకు శిక్ష పడేలా, కేసుల దర్యాప్తు వేగంగా చేసేందుకు రాచకొండ పోలీస్ కమిషనరేట్లోని సిబ్బందికి శిక్షణ కార్యక్రమాన్ని నిర్వహించారు. ఈ సందర్భంగా సీపీ మాట్లాడుతూ.. మత్తుపదార్థాల వాడకం.. సమాజానికి చీడ పురుగు వంటిదన్నారు. మత్తు పదార్థాల బారినపడిన యువత బంగారు భవిష్యత్ నాశనమవుతున్నదని ఆందోళన వ్యక్తం చేశారు.
డ్రగ్స్కు సంబంధించిన ఎన్డీపీఎస్ చట్టం – 1985 అమలు తీరు పట్ల దర్యాప్తు అధికారులు సంపూర్ణ అవగాహన కలిగి ఉండాలని సూచించారు. డ్రగ్స్ సరఫరా చేసే ముఠాలతో దేశ ఆర్థిక వ్యవస్థ ప్రమాదంలో పడటంతో పాటు, ఈ ముఠాలు తీవ్రవాదానికి ఆర్థికంగా సహాయం చేస్తుండటంతో దేశ భద్రతకు సవాల్గా మారిందన్నారు. కమిషనరేట్ పరిధిలో డ్రగ్స్ రవాణా, వినియోగంపై కట్టుదిట్టమైన చర్యలు తీసుకోవాలని సూచించారు. ఈ సమావేశంలో డీసీపీ(క్రైమ్) అరవింద్ బాబు, కస్టమ్స్ అండ్ ఎక్సైజ్ అప్పీలేడ్ ట్రిబ్యునల్ ప్రతినిధి రంగనాథం, ఏసీపీలు రమేశ్, నరేందర్గౌడ్ తదితరులు పాల్గొన్నారు.