సిటీబ్యూరో, జూలై 26 (నమస్తే తెలంగాణ): లక్ష్యం మేరకు ప్రాపర్టీ ట్యాక్స్ వసూలుకు చర్యలు తీసుకోవాలని కమిషనర్ ఆమ్రపాలి తెలిపారు. శుక్రవారం జోనల్ అదనపు కమిషనర్లతో కమిషనర్ టెలి కాన్ఫరెన్స్ నిర్వహించారు. సీఆర్ఎంసీ ద్వారా చేపట్టిన రోడ్లకు సంబంధించి ఏజెన్సీలతో చేసుకున్న అగ్రిమెంట్ డిసెంబర్ వరకు గడువు ఉన్నదని.. పెండింగ్లో ఉన్న మెయింటెనెన్స్ పనులను వెంటనే పూర్తి చేయించాలని జోనల్ కమిషనర్లను ఆదేశించారు.
డెంగీ వ్యాధి నియంత్రణకు చేపట్టిన అవగాహన కార్యక్రమాలు ముమ్మరంగా చేపట్టాలన్నారు. దోమలతో వచ్చే వ్యాధులతో పాటు ఈగల ద్వారా వచ్చే వ్యాధులపై కూడా అవగాహన కల్పించాలని తెలిపారు. పరిసరాల పరిశుభ్రతపై నగర వాసులు దృష్టి సారించాలని కమిషనర్ సూచించారు. కమ్యూనిటీ హాల్స్ వివరాలు సర్కిల్ వారీగా పూర్తి నివేదిక సమర్పించాలని అధికారులకు కమిషనర్ ఆదేశాలు జారీ చేశారు.