సికింద్రాబాద్, జూలై 16 : సికింద్రాబాద్లో బోనాల జాతర సందర్భంగా అమ్మవారి ఆలయాల చెక్కుల పంపిణీ కార్యక్రమం రసాభాసగా మారింది. శాంతి యుత వాతావరణం నుంచి చిలికి చిలికి గాలి వానయింది. దీనంతటికి కారణం కాంగ్రెస్ పార్టీ నాయకులు ప్రొటోకాల్ పాటించడం లేదని.. స్థానిక సికింద్రాబాద్ ఎమ్మెల్యే తీగుల్ల పద్మారావుగౌడ్ను చెక్కుల పంపిణీ కార్యక్రమానికి ఆహ్వానించలేదని బీఆర్ఎస్ కార్పొరేటర్లు, నాయకులు మండిపడ్డారు. శాంతియుతంగా నిరసన తెలపాలనుకున్న బీఆర్ఎస్ నాయకులు, కార్పొరేటర్లను పోలీసులతో పాటు కాంగ్రెస్ నాయకులు అడ్డుకున్నారు. దీంతో పరిస్థితి ఒక్కసారిగా వేడెక్కింది. ఓ క్రమంలో తోపులాట వరకు వెళ్లింది. అప్పటికే అక్కడికి చేరుకున్న పోలీసులు పరిస్థితిని అదుపులోకి తీసుకొచ్చేందుకు ప్రయత్నం చేశారు. ఈ క్రమంలో సీతాఫల్మండి ఎమ్మెల్యే క్యాంపు కార్యాలయం పక్కనే ఉండటంతో దీంతో పెద్ద ఎత్తున బీఆర్ఎస్ నాయకులు, కార్యకర్తలు నిరసనకు తరలివచ్చారు. బీఆర్ఎస్ పార్టీ నేతలు ఆందోళన చేపడతారన్న ముందస్తు సమాచారంతో పోలీసులు పటిష్ట బందోబస్తు చేపట్టారు. ఎమ్మెల్యే క్యాంపు కార్యాలయం పక్కనే ఉన్న సీతాఫల్మండి మల్టీ పర్పస్ ఫంక్షన్ హాల్ను కూడా పోలీసులు తమ ఆధీనంలోకి తీసుకున్నారు.
లోపలికి వచ్చే గేటును మూసివేసి, వాహనాలను లోపలికి అనుమతించలేదని బీఆర్ఎస్ నాయకులు తెలిపారు. ఎక్కడ చూసినా కాంగ్రెస్ పార్టీ నాయకుల బ్యానర్లేనని, వారి ఫొటోలే దర్శనమిస్తున్నాయని ఆగ్రహం వ్యక్తం చేశారు. ఈ క్రమంలో స్థానిక ఎమ్మెల్యే పద్మారావుగౌడ్ను చెక్కుల పంపిణీ కార్యక్రమానికి ఎందుకు ఆహ్వానించలేదని బీఆర్ఎస్ పార్టీ కార్పొరేటర్లు హేమ, కంది శైలజ, సునీత, ప్రసన్నలక్ష్మితో పాటు నాయకులు ఆలకుంట హరి, పాక సాయి, వనమాల భాస్కర్, బెజ్జెంకి రాజేశ్, కంది నారాయణ, శ్రీనివాస్లు.. సికింద్రాబాద్ కాంగ్రెస్ పార్టీ ఇన్చార్జి ఆదం సంతోష్ కుమార్ను అడ్డుకుని నిలదీశారు. దీంతో ఒక్కసారిగా ఇరువర్గాల నాయకులు ఒకరినొకరు తోసుకున్నారు. అక్కడే ఉన్న పోలీసులు ఇరు వర్గాలను శాంతింపజేశారు. అయినా పట్టు వీడని బీఆర్ఎస్ నాయకులు , కార్పొరేటర్లు చెక్కుల పంపిణీ కార్యక్రమాన్ని అడ్డుకున్నారు. స్టేజీపై ఉన్న కాంగ్రెస్ పార్టీ బ్యానర్ను తొలగించాలని డిమాండ్ చేశారు. ఎక్కడ కూడా తమ ఎమ్మెల్యే పద్మారావు ఫొటో లేదని ఏం ఫ్రొటోకాల్ పాటిస్తున్నారని ప్రశ్నించారు. కాగా స్టేజీ పైఉన్న బ్యానర్ను తొలగించాలని బీఆర్ఎస్ నాయకులు పట్టుబట్టారు. దీంతో పరిస్థితి ఉద్రిక్తంగా మారింది. అనంతరం పద్మారావుకు మద్దతుగా బీఆర్ఎస్ నాయకులు పెద్ద ఎత్తున నినాదాలు చేశారు. చెక్కుల పంపిణీ కార్యక్రమాన్ని ఎమ్మెల్యే వచ్చేదాకా ఆపాలని డిమాండ్ చేశారు. తీవ్ర ఘర్షణల మధ్య పోలీసుల పహారాలో ఎట్టకేలకు ప్రభుత్వ సలహాదారు వేం నరేందర్రెడ్డి ఆలయాల చెక్కులను నగర డిప్యూటీ మేయర్ శ్రీలతారెడ్డి, కార్పొరేటర్లు హేమ, సునీత, శైలజ, ప్రసన్నలక్ష్మితో కలిసి పంపిణీ చేశారు.
ప్రొటోకాల్ విషయంలో స్పీకర్ గడ్డం ప్రసాద్ కుమార్కు ఫిర్యాదు చేస్తున్న బీఆర్ఎస్ ఎమ్మెల్యేలు కేటీఆర్, హరీశ్రావు , పద్మారావు గౌడ్, ప్రశాంత్ రెడ్డి, సునీతా రెడ్డి, వివేకానంద్, ముఠా గోపాల్, కాలేరు వెంకటేశ్, మర్రి రాజశేఖర్ రెడ్డి , మాధవరం కృష్ణారావు, సంజయ్, ప్రభాకర్ తదితరులు
సికింద్రాబాద్ బోనాల జాతర ఆలయాల చెక్కుల పంపిణీ కార్యక్రమంలో నిరసన తెలిపిన బీఆర్ఎస్ నాయకులను పోలీసులు అరెస్టు చేశారు. వారందరిని డీసీఎంలో చిలకలగూడ పోలీస్ స్టేషన్కు తరలించారు. సాయంత్రం సొంత పూచీకత్తుపై విడుదల చేశారు.