సిటీబ్యూరో, ఫిబ్రవరి 14 (నమస్తే తెలంగాణ): హత్య ఘటనలో పాల్గొన్న ఒక రౌడీషీటర్ కోసం పోలీసులు గాలింపు చర్యలు చేపట్టారు. అయితే, ఘటన జరిగిన తర్వాత దర్యాప్తు అధికారులు రౌడీషీటర్ అంశాన్ని ఎక్కడ ప్రస్తావించలేదు. దీంతో హత్య కేసులో పోలీసులెందుకిలా..? అంటూ జూబ్లీహిల్స్ పోలీసుల దాగుడుమూతలు ‘శీర్షిక’తో ‘నమస్తే తెలంగాణ’లో వచ్చిన కథనంపై పోలీసులు స్పందించారు. రౌడీషీటర్ జిలానీ ఎక్కడున్నా వదిలేది లేదని, దర్యాప్తు మరింత లోతుగా జరుగుతుందని పోలీసులు వెల్లడించారు. రౌడీషీటర్ జిలానీని పట్టుకునేందుకు ప్రత్యేక బృందాలను రంగంలోకి దింపారు. జూబ్లీహిల్స్ పోలీస్స్టేషన్ పరిధిలో జరిగిన పుట్టా రాము హత్య కేసులో 8 మంది నిందితులను అరెస్ట్ చేసిన విషయం తెలిసిందే. ఈ హత్యలో బోరబండకు చెందిన రౌడీషీటర్ జిలానీ పాత్ర ఉన్నట్లు సీసీ కెమెరాల ద్వారా పోలీసులు గుర్తించారు.
జిలానీ గతంలో చేసిన హత్యలు, హత్యా యత్నాలు, మరణాయుధాలకు సంబంధించిన కేసులపై కూడా ఆరా తీస్తున్నారు. జిలానీతో పాటు మరికొందరిని కూడా ఈ కేసులో అరెస్ట్ చేయనున్నారు. కాగా, ఈ హత్య అమ్మాయి విషయంలో ఏర్పడ్డ తగాదా, పాత పగల నేపథ్యంలోనే జరిగినట్లు పోలీసులు గుర్తించారు. కాగా, మృతుడు రాముకు.. రౌడీషీటర్ జిలానీకి ఆర్థిక లావాదేవీలు, రియల్ ఎస్టేట్ వ్యాపారాలేమైనా ఉన్నాయా..? వాటి విషయంలో ఏమైనా వివాదాలు ఉన్నాయా.. అనే అంశాలను కూడా పరిగణలోకి తీసుకొని తాజాగా ఆరా తీస్తున్నారు. ఇదిలాఉండగా.. బుధవారం అర్ధరాత్రి సమయంలో రౌడీషీటర్ జిలానీతో పాటు మరో ముగ్గురిని జూబ్లీహిల్స్ పోలీసులు అదుపులోకి తీసుకున్నట్లు సమాచారం.