Vana Mahotsavam | మేడ్చల్, జూలై 14(నమస్తే తెలంగాణ): వన మహోత్సవంలో భాగంగా మేడ్చల్ జిల్లాలో 63 లక్షల మొక్కలు నాటేందుకు యాక్షన్ ప్లాన్ సిద్ధం చేయాలని కలెక్టర్ గౌతమ్ అధికారులను ఆదేశించారు. జిల్లాలోని మున్సిపాలిటీ, మండలాల పరిధిలో ప్రదేశాలను గుర్తించి, మొక్కలు నాటే కార్యక్రమానికి శ్రీకారం చుట్టాలని సూచించారు. అయితే ఇప్పటి వరకు అధికారులు వన మహోత్సవ కార్యక్రమంపై ఎలాంటి దృష్టి సారించలేదని తెలుస్తున్నది.
మొక్కలు నాటేందుకు సిద్ధంగా ఉన్నా.. అధికారులు ప్రణాళిక సిద్ధం చేయకపోవడంతో కార్యక్రమం అమలవుతుందా అనే అనుమానాలు వ్యక్తమవుతున్నాయి. ఇదిలా ఉంటే జిల్లాలోని అటవీశాఖ, 13 మున్సిపాలిటీలు, 61 గ్రామ పంచాయతీల్లో ఉన్న నర్సరీల్లో 45 లక్షల మొక్కలు సిద్ధంగా ఉన్నట్లు అధికారులు పేర్కొంటున్నారు. మొక్కలు నాటే లక్ష్యాన్ని చేరుకునే విధంగా మున్సిపాలిటీ అధికారులు, జిల్లా అధికారులు, ఎంపీడీవోలు లక్ష్యాన్ని నిర్దేశించారు. నాటిన మొక్కలకు ట్రీ గార్డ్ను ఏర్పాటు చేసి రక్షణ చర్యలు తీసుకోనున్నారు. నాటిన ప్రతి మొక్కను సంరక్షించే విధంగా ప్రజలను భాగస్వాములను చేయనున్నారు.