సిటీబ్యూరో, జూలై 10 (నమస్తే తెలంగాణ): కాంట్రాక్ట్ నర్సింగ్ సిబ్బంది జీతాల విషయంలో ఎట్టకేలకు తెలంగాణ సర్కారు దిగివచ్చింది. మూడు నెలలుగా జీతాలు లేక ఇబ్బందులకు గురవుతున్న టిమ్స్ కాంట్రాక్ట్ నర్సింగ్ సిబ్బంది ఆవేదనను ‘జీతాలో రాజనర్సింహ’ పేరుతో ఈనెల 9న ‘నమస్తే’లో ప్రచురించిన కథనానికి ప్రభుత్వం స్పందించింది. నగర వ్యాప్తంగా వివిధ దవాఖానల్లో విధులు నిర్వర్తిస్తున్న 180 మంది టిమ్స్ కాంట్రాక్ట్ నర్సింగ్ సిబ్బందికి బుధవారం రెండు నెలలకు సంబంధించిన వేతనాలు చెల్లించారు. రెండు నెలల జీతాలు ఒకేసారి చెల్లించడంపై నర్సింగ్ సిబ్బంది హర్షం వ్యక్తం చేశారు. ఈ సందర్భంగా ఉద్యోగులు సీఎం రేవంత్రెడ్డి, వైద్య, ఆరోగ్యశాఖ మంత్రి దామోదర రాజనర్సింహకు కృతజ్ఞతలు తెలిపారు. తమలాంటి చిరు ఉద్యోగులకు ఇక నుంచి క్రమం తప్పకుండా జీతాలు చెల్లించేలా అధికారులకు ఆదేశాలివ్వాలని నర్సింగ్ సిబ్బంది ప్రభుత్వానికి విజ్ఞప్తి చేశారు.