సిటీబ్యూరో, జూలై 18 (నమస్తే తెలంగాణ) : జీహెచ్ఎంసీ సర్కిల్ పరిధిలో చేపట్టిన వివిధ సివిల్ వర్క్స్ టెండర్ల ప్రక్రియను వేగవంతంగా పూర్తి చేయాలని బల్దియా కమిషనర్ ఆమ్రపాలి సంబంధిత ఇంజినీరింగ్ అధికారులను ఆదేశించారు. గురువారం జూబ్లీహిల్స్ సర్కిల్లో పర్యటించిన కమిషనర్.. లోటస్పాండ్, పాత్వే, మంగోలియా బేకరీ వద్ద ఉన్న పార్కును పరిశీలించి.. అధికారులకు పలు సూచనలు చేశారు. లోటస్ పాండ్లోని సీవరేజీ కనెక్షన్లను తొలగించాలని, నాలాల్లో స్ట్రామ్ వాటర్, ఫ్లోటింగ్ మెటీరియల్ రాకుండా మెష్ ఏర్పాటు చేయాలని సూచించారు.
దెబ్బతిన్న పాత్వేలకు మరమ్మతులు చేపట్టాలన్నారు. మంగోలియా బేకరీ వద్ద నుంచి రోడ్ నంబర్ 44, 45 వరకు రోడ్డు, సీవరేజీ పనులు చేపట్టేందుకు సంబంధించిన సివిల్ వర్క్ టెండర్ల ప్రక్రియను త్వరతగతిన పూర్తి చేయాలన్నారు. హైటెన్షన్ వైర్లు దిగువన ఉన్న అన్ని పార్కులను థీమ్ పార్కులుగా అభివృద్ధి చేసేందుకు చర్యలు చేపట్టాలని యూబీడీ అధికారులకు సూచించారు.
ఈ కార్యక్రమంలో జోనల్ కమిషనర్ అనురాగ్ జయంతి, ఈఈ విజయ కుమార్, డిప్యూటీ కమిషనర్ ప్రశాంతి తదితరులు పాల్గొన్నారు. అలాగే జోనల్ కమిషనర్, అడిషనల్ కమిషనర్ యూసీడీ, హెల్త్, చీఫ్ ఎంటమాలజీ, కాల్ సెంటర్ ఓఎస్డీలతో కమిషనర్ ఆమ్రపాలి టెలీకాన్ఫరెన్స్ నిర్వహించారు. గ్రేటర్లో దోమల ఉత్పత్తి అయ్యే హాట్ స్పాట్లను గుర్తించి.. దోమల నివారణకు చర్యలు తీసుకోవాలని అధికారులను ఆదేశించారు.
డెంగీ వ్యాధి నివారణలో భాగంగా పాఠశాల, కాలేజీల్లో చేపట్టే అవగాహన కార్యక్రమాలను వెంటనే పూర్తి చేసి, హాట్ స్పాట్లపై దృష్టి సారించాలన్నారు. ఈఎంఐ పూర్తి చేసిన స్వచ్ఛ ఆటో యజమాని సక్రమంగా హాజరు కాకుండా నిర్దేశించిన ప్రకారంగా చెత్త సేకరణ చేయని పక్షంలో తగిన చర్యలు తీసుకోవాలని ఆదేశించారు. యుద్ధ ప్రాతిపదికన జీవీపీల తొలగింపు ప్రక్రియను వేగవంతం చేయాలన్నారు. షాపింగ్ మాల్, సినిమా థియేటర్లలో టాయిలెట్లు పరిశుభ్రంగా ఉండే విధంగా, ఫైర్ సేఫ్టీ కూడా పరిశీలన చేసి.. సర్కిల్ వారీగా నివేదిక సమర్పించాలని అధికారులను ఆదేశించారు.