HMDA | సిటీబ్యూరో, జూన్ 5 (నమస్తే తెలంగాణ): హైదరాబాద్ మెట్రోపాలిటన్ డెవలప్మెంట్ అథారిటీ(హెచ్ఎండీఏ)కు కొత్త మెట్రోపాలిటన్ కమిషనర్ రానున్నారా? అంటే అవుననే అంటున్నాయి అధికార వర్గాలు. రాష్ట్రంలో సుదీర్ఘ కాలం ఎన్నికల కోడ్ అమల్లో ఉంది. అసెంబ్లీ ఎన్నికల ముగిసిన రెండు నెలలకే మళ్లీ పార్లమెంట్ ఎన్నికల ప్రక్రియ ప్రారంభమైంది. దీంతో రాష్ట్రంలో అధికారం చేపట్టిన కాంగ్రెస్ ప్రభుత్వం పూర్తి స్థాయిలో కొత్తగా నియామకాలు, ఉన్నతాధికారుల బదిలీలను చేపట్టలేదు. ప్రస్తుతం గురువారంతో ఎన్నికల కోడ్ ముగియనుండటంతో పెద్ద ఎత్తున అధికారుల బదిలీలు ఉండనున్నాయి.
హైదరాబాద్ మహానగరాభివృద్ధిలో ఎంతో కీలకమైన హెచ్ఎండీఏ కమిషనర్ను సైతం మార్చి కొత్త వారిని నియమించనున్నారనే సమాచారం. ఇదే విషయాన్ని హెచ్ఎండీఏలో ప్రధానంగా చర్చించుకుంటున్నారు. ప్రస్తుతం రాష్ట్ర పురపాలక, పట్టణాభివృద్ధి శాఖ ప్రిన్సిపల్ సెక్రెటరీగా ఉన్న దాన కిశోర్ హెచ్ఎండీఏ కమిషనర్గానూ వ్యవహరిస్తున్నారు. ప్రస్తుత పరిస్థితుల్లో హెచ్ఎండీఏకు ప్రత్యేకంగా కమిషనర్ ఉంటేనే పరిపాలన బాగుంటుందనే అభిప్రాయాన్ని ఉద్యోగులతో పాటు ప్రభుత్వం భావిస్తోంది. ఈ నేపథ్యంలోనే సీనియర్ ఐఏఎస్ అధికారుల్లో ఒకరిని మెట్రో పాలిటన్ కమిషనర్గా నియమించే అవకాశం ఉందని తెలుస్తోంది. అదేవిధంగా హెచ్ఎండీఏలోని వివిధ విభాగాల్లోనూ ఉన్నతాధికారుల బదిలీలు ఉంటాయన్న చర్చ జరుగుతున్నది.