మల్కాజిగిరి, జూలై 24: పేదింటి ఆడ బిడ్డల పెండ్లిండ్లకు కల్యాణ లక్ష్మీ చెక్కులు సరే మరి.. తులం బంగారమేది ?అని ఎమ్మెల్యే మర్రి రాజశేఖర్ రెడ్డి ప్రశ్నించారు. బుధవారం అల్వాల్ మండల కార్యాలయంలో కల్యాణ లక్ష్మీ-షాదీముబారక్ చెక్కులను లబ్ధిదారులకు ఎమ్మెల్యే అందజేశారు. ఈ సందర్భంగా ఎమ్మెల్యే మర్రి రాజశేఖర్రెడ్డి మాట్లాడుతూ పేదింటి ఆడబిడ్డల పెండ్లిండ్ల కోసం ఆర్థికంగా ఆదుకోవడానికి గత సీఎం కేసీఆర్ కల్యాణ లక్ష్మీ- షాదీముబారక్ పథకాన్ని ప్రారంభించారన్నారు.
రూ.50వేల నుంచి విడతలవారీగా రూ.1,00,116లకు పెంచారని గుర్తు చేశారు. కాంగ్రెస్ నేతలు ఎన్నికల ప్రచారంలో కల్యాణ లక్ష్మీ – షాదీముబారక్ పథకంలో రూ.1 ,00,116తో పాటు తులం బంగారం అందజేస్తామని ప్రసంగాల్లో ఉదరగొట్టారన్నారు. ప్రభుత్వం వచ్చి ఎనిమిది నెలలవుతున్నా తులం బంగారం ఊసేలేదని విమర్శించారు.