కేపీహెచ్బీ కాలనీ/మియాపూర్/మూసాపేట/బాలానగర్, జూలై 16: బోనాల ఉత్సవాలు తెలంగాణ సంస్కృతికి, సంప్రదాయాలకు ప్రతీక అని ఎంపీ కే.కేశవరావు, ఎమ్మెల్యే మాధవరం కృష్ణారావు అన్నారు. ఆషాఢ మాసం సందర్భంగా మూసాపేట డివిజన్ పరిధిలోని పాండురంగానగర్, బబ్బుగూడ, కబీర్నగర్, స్నేహపూరికాలనీ, భరత్నగర్లోని కొలువుదీరిన శ్రీరేణుక ఎల్లమ్మ, నల్లపోచమ్మ, చిత్తారమ్మ అమ్మవార్లకు ఎంపీ కే.కేశవరావు, ఎమ్మెల్యే మాధవరం, మాజీ కార్పొరేటర్ తూము శ్రావణ్కుమార్ కలిసి ప్రత్యేక పూజలు నిర్వహించారు. ఈ సందర్భంగా ఎమ్మెల్యే మాధవరం కృష్ణారావు మాట్లాడుతూ.. తెలంగాణ సంస్కృతి సంప్రదాయాల్లో బోనాల పండగ ఓ భాగమని, తెలంగాణ రాష్ట్ర పండగ బోనాల ఉత్సవాలను ఘనంగా నిర్వహించేందుకు ప్రభుత్వం ప్రత్యేకంగా నిధులను కేటాయిస్తూ సహకరిస్తుందన్నారు. తెలంగాణ రాష్ట్రం ఏర్పడిన తర్వాత బోనాల ఉత్సవాలను మరింత ప్రతిష్టాత్మకంగా నిర్వహిస్తున్నామన్నారు. అన్ని దేవాలయాలకు బోనాల నిధులు మంజూరయ్యేలా కృషి చేస్తానన్నారు. ఈ కార్యక్రమంలో డివిజన్ అధ్యక్షుడు అంబటి శ్రీనివాస్, ప్రధానకార్యదర్శి తిరుపతి తదితరులు పాల్గొన్నారు.
* అమ్మలగన్న మాయమ్మ ముగ్గురమ్మల మూలపుటమ్మకు భక్తులు బోనాలు సమర్పించారు. బాలానగర్ పారిశ్రామికవాడ అమ్మవార్లకు బోనమెత్తింది. ఆషాఢమాసం బోనాల పండుగ సందర్భంగా ఓల్డ్బోయిన్పల్లి, బాలానగర్, ఫతేనగర్ డివిజన్ల పరిధిలలో ఆదివారం అమ్మవారి ఆలయాలు భక్తజన సందోహంతో కిటకిటలాడాయి. అమ్మా బైలెల్లినాదో.. తల్లి బైలెల్లినాదో.. అంటూ మార్మోగిన ఆటపాటలతో అమ్మవారికి బోనాలు, తొట్టెల ఊరేగింపు, ఫలహారబండ్ల ఊరేగింపులతో బాలానగర్ పారిశ్రామికవాడ ఆధ్యాత్మికను సంతరించుకుంది. డప్పుల దరువు.. శివసత్తుల పూనకాలు… పోతురాజుల విన్యాసాలు.. తొట్టెల ఊరేగింపులు.. బోనాల ఊరేగింపు ప్రజలకు ఉత్సాహాన్నిచ్చాయి. ఈ సందర్భంగా కూకట్పల్లి ఎమ్మెల్యే మాధవరం కృష్ణారావు, కార్పొరేటర్లు ముద్దం నర్సింహాయాదవ్, ఆవుల రవీందర్రెడ్డి, పండాల సతీశ్గౌడ్లు వేర్వేరుగా పలు అమ్మవారి ఆలయాలను సందర్శంచి అమ్మవారికి ప్రత్యేక పూజలు చేసి మొక్కులు తీర్చుకున్నారు. ఆయా ప్రాంతాల ఆలయ కమిటీ సభ్యులకు, ప్రజలకు వారు బోనాల పండుగ శుభాకాంక్షలు తెలియజేశారు.
* కూకట్పల్లి నియోజకవర్గం పరిధిలో ఆషాఢం బోనాల వేడుకలు కన్నుల పండువగా జరిగాయి. కేపీహెచ్బీ కాలనీ, బాలాజీనగర్, అల్లాపూర్, మూసాపేట, ఫతేనగర్, ఓల్డ్ బోయిన్పల్లి, బాలానగర్, కూకట్పల్లి, వివేకానందనగర్, హైదర్నగర్, ఆల్విన్కాలనీ డివిజన్ల పరిధిలో గ్రామదేవతల ఆలయాలలో బోనాల వేడుకలు ఘనంగా జరిగాయి. ఉదయం నుంచి సాయంత్రం వరకు భక్తులు బోనాలతో అమ్మవారికి నైవేద్యాలను సమర్పించి మొక్కులను తీర్చుకున్నారు. కూకట్పల్లి చిత్తారమ్మ దేవాలయం, మూసాపేట చిత్తారమ్మ దేవాలయం, కేపీహెచ్బీ కాలనీ 3వ ఫేజ్లోని పోచమ్మ ఆలయం, బంగారుమైసమ్మ ఆలయం, 7వ ఫేజ్లోని పెద్దమ్మ ఆలయం ఆయా కాలనీలలోని అమ్మవారి ఆలయాలలో వేడుకలు వైభవంగా జరిగాయి. కూకట్పల్లి నియోజకవర్గంలోని పలు ప్రాంతాల్లో అమ్మవారి ఆలయాల్లో కూకట్పల్లి ఎమ్మె ల్యే మాధవరం కృష్ణారావు దంపతులు ప్రత్యేక పూజలు చేయగా ఆయా కాలనీల్లో కార్పొరేటర్లు మందడి శ్రీనివాస్రావు, పగుడాల శిరీషాబాబురావు, సబీహాబేగం, పండాల సతీశ్ గౌడ్, ముద్దం నర్సింహయాదవ్, ఆవుల రవీందర్రెడ్డి, జూపల్లి సత్యనారాయణ, మాధవరం రోజారంగారావు, నార్నె శ్రీనివాస్రావు, దొడ్ల వెంకటేశ్ గౌడ్లతో పాటు బీఆర్ఎస్ నేతలు బోనాల వేడుకల్లో పాల్గొని ప్రత్యేక పూజలు చేశారు.