కుత్బుల్లాపూర్,మే 19: కుత్బుల్లాపూర్ నియోజకవర్గంలోని సుచిత్ర చౌరస్తాలో మాజీ మంత్రి మల్లారెడ్డి భూ వివాదంలో తాము ఏ సర్వే చేపట్టినా సిద్ధంగా ఉన్నామని ప్రభుత్వ విప్, ధర్మపురి ఎమ్మెల్యే అడ్డూరి లక్ష్మణ్కుమార్ అన్నారు. ఆదివారం కొంపల్లిలో ఏర్పాటు చేసిన విలేకరుల సమావేశంలో ఆయన మాట్లాడారు. 2015లో తనతో పాటు మరో ఎనిమిది మంది కలిసి సర్వే నంబర్ 82/1/ఈఈలో నాలుగు వేల గజాల స్థలాన్ని కె.సుధామ వద్ద నుంచి కొనుగోలు చేశామన్నారు. 2021లో శేరి శ్రీనివాస్రెడ్డి అనే వ్యక్తికి అందరం కలిసి విక్రయించామన్నారు.
గతంలో మంత్రి పదవీలో కొనసాగిన మల్లారెడ్డి.. ఆ స్థలంలో ఎందుకు నిర్మాణ పనులు చేపట్టలేదని ప్రశ్నించారు. కోర్టు ఇంజెక్షన్ ఆర్డర్ ఇచ్చినా.. దానికి ఎలాంటి స్పందన ఇవ్వలేదన్నారు. సర్వే చేయడానికి నోటీసులు ఇప్పిస్తే దానికి స్పందించకుండా తన వియ్యంకుడు మర్రి లక్ష్మారెడ్డితో సమాధానం పంపించాడని, స్థలంలో వెలిసిన తేజా వైన్స్ను నిషేధించాలని ఎక్సైజ్ శాఖకు, అందులో ఎలాంటి వ్యవహారాలు జరపరాదని మున్సిపల్, పోలీసు శాఖలకు ఫిర్యాదులు చేసినా.. ఎవ్వరూ పట్టించుకున్న పాపనపోలేదన్నారు. మల్లారెడ్డికి సంబంధించిన స్థలం పక్కన ఉన్న తమ భూమిని ఆక్రమించి, సినీ ప్లానెట్ కట్టేందుకు ప్రణాళికలను సిద్ధం చేసుకున్నారన్నారు.
సాటి ఎమ్మెల్యేగా గౌరవమిస్తానని, చట్టపరంగా వ్యవహరించాలని కోరారు. మాది తప్పు అని తేలితే అక్కడి నుంచి తప్పుకుంటామన్నారు. మల్లారెడ్డి ఏ సర్వే చేపట్టినా మేమంతా సిద్ధంగా ఉన్నామన్నారు. ఆ స్థలం విషయంలో తనకు ఎలాంటి సంబంధం లేదని, అనవసరంగా మాజీ మంత్రి మల్లారెడ్డి తనపై నిందలు వేయడం సరికాదన్నారు. తనకు సంబంధించిన భూమిని శేరి శ్రీనివాస్రెడ్డికి అమ్మినట్లు చెప్పారు. తనను ఈ భూ వివాదంలోకి లాగొద్దని, ఏదైనా న్యాయపరమైన అంశాలపై చర్చ ఉంటే తాను సిద్ధంగా ఉన్నానని తెలిపారు. ఈ సమావేశంలో కాంగ్రెస్ పార్టీ కుత్బుల్లాపూర్ ఇన్చార్జి కొలన్ హన్మంత్రెడ్డి, మాజీ ఎమ్మెల్యే కూన శ్రీశైలంగౌడ్, రాష్ట్ర నాయకులు కొలన్ శ్రీనివాస్రెడ్డి, బీ బ్లాక్ అధ్యక్షుడు బండి శ్రీనివాస్గౌడ్తో పాటు స్థానిక నేతలు, కార్యకర్తలు పాల్గొన్నారు.