జవహర్నగర్, నవంబర్ 10: అనుమానం పెనుభూతమై భార్య గొంతుకోసి.. భర్త ఆత్మహత్య చేసుకున్నాడు. జవహర్నగర్ ఇన్స్పెక్టర్ కె.చంద్రశేఖర్ కథనం ప్రకారం.. రాజీవ్గాంధీనగర్లో ఉంటున్న బండరాజు (41), కవిత (36) దంపతులు. వీరికి ఇద్దరు సంతానం. రాజు ఆటో డ్రైవర్. కవిత ఇండ్లల్లో పారిశుధ్య పనులు చేసుకుంటూ జీవనం సాగిస్తున్నారు. వీరి కుమార్తె శ్రావణి జ్యోతిబాఫూలే రెసిడెన్షియల్లో ఇంటర్, కుమారుడు సిద్ధార్థ బాలాజీనగర్లోని ప్రభుత్వ పాఠశాలలో పదో తరగతి చదువుతున్నారు. సాఫీగా సాగుతున్న వీరి జీవితంలోకి వచ్చిన అనుమానం పెనుభూతంగా మారింది. గత కొన్ని రోజులుగా భార్యాభర్తల మధ్య గొడవలు జరుగుతున్నాయి. గురువారం కూడా భార్యాభర్తలు గొడవపడ్డారు.
రాజు క్షణికావేశంలో భార్య కవిత గొంతును కత్తితో కోశాడు. కవిత అక్కడికక్కడే మరణించింది. ఆ తర్వాత రాజు కూడా ఇంట్లోని సీలింగ్ ఫ్యాన్కు ఉరివేసుకుని ఆత్మహత్య చేసుకున్నాడు. దీంతో వారిద్దరి పిల్లలు ఒంటరయ్యారు. సమాచారం తెలుసుకున్న కుషాయిగూడ ఏసీపీ సాధన రష్మి పెరుమాళ్, డీసీపీ రక్షితామూర్తి, జవహర్నగర్ ఎస్సైలు అనిల్రెడ్డి, అనిల్కుమార్ సంఘటనా స్థలాన్ని సందర్శించారు. మృతదేహాలను గాంధీ దవాఖానకు తరలించారు. కేసు నమోదు చేసిన పోలీసులు దర్యాప్తు చేపట్టారు.