సిటీబ్యూరో ప్రధాన ప్రతినిధి, జూన్ 4 (నమస్త తెలంగాణ): ‘ప్రధాని మోదీ, కేంద్ర హోం మంత్రి అమిత్షా ప్రాతినిథ్యం వహించే రెండు నియోజకవర్గాలు కలిపినా నా నియోజకవర్గం (మల్కాజిగిరి పార్లమెంటు స్థానం) అంత పెద్దగా ఉండవు. దేశంలోనే అతి పెద్ద నియోజకవర్గమైన మల్కాజిగిరి లోక్సభ స్థానానికి నేను ప్రాతినిథ్యం వహిస్తున్నాను…’ నిన్నటిదాకా రాష్ట్ర ముఖ్యమంత్రి రేవంత్రెడ్డి తన సిట్టింగ్ స్థానంపై చెప్పుకునే గొప్పలివి. కానీ తాజా ఫలితాల్లో మల్కాజిగిరి ‘చే’జారిపోయింది. సీఎం రేవంత్ సిట్టింగ్ స్థానంలో హస్తం హవా కొనసాగించాలని తీవ్ర ప్రయత్నాలు చేసి, ప్రతిష్ఠాత్మకంగా తీసుకున్నా ఓటర్లు మాత్రం కాంగ్రెస్ పార్టీని ఆదరించలేదు. ఇదే ప్రస్తుతం కాంగ్రెస్ పార్టీలోనే కాదు.. తెలంగాణ రాజకీయాల్లో ప్రధాన చర్చనీయాంశంగా మారింది.
హైదరాబాద్ మహా నగర పరిధిలోకి వచ్చే మల్కాజిగిరి పార్లమెంటు స్థానానికి ఒక చరిత్ర ఉంది. గతంలో దేశంలోనే అతి పెద్ద అసెంబ్లీ నియోజకవర్గంగా ఖైరతాబాద్ ఉండేది. 2009లో జరిగిన నియోజకవర్గాల పునర్విభజనలో భాగంగా ఖైరతాబాద్ ఆ ప్రాధాన్యతను కోల్పోయింది. ఖైరతాబాద్తో పాటు జూబ్లీహిల్స్, శేరిలింగంపల్లి, కూకట్పల్లి నియోజకవర్గాలుగా ఏర్పడ్డాయి. ఇదే సమయంలో లోక్సభ స్థానాలు కూడా పునర్విభజన జరగడంతో సిద్దిపేట స్థానంలో మల్కాజిగిరి పార్లమెంటు స్థానం ఏర్పడింది. మల్కాజిగిరి, కంటోన్మెంట్, మేడ్చల్, కూకట్పల్లి, కుత్బుల్లాపూర్, ఉప్పల్, ఎల్బీనగర్ అసెంబ్లీ స్థానాలతో ఏర్పడిన ఈ నియోజకవర్గం దేశంలోనే అతి పెద్ద లోక్సభ స్థానంగా ఆవిర్భవించింది. ఈ క్రమంలో 2019 పార్లమెంటు ఎన్నికల్లో మల్కాజిగిరి నుంచి రేవంత్రెడ్డి కాంగ్రెస్ పార్టీ తరపున పోటీ చేసి విజయం సాధించారు. ఐదేళ్లు తిరిగేసరికి రేవంత్రెడ్డి ముఖ్యమంత్రి అయ్యారు. దేశంలోనే అతి పెద్ద నియోజకవర్గంతో పాటు సీఎం రేవంత్రెడ్డి ప్రాతినిథ్యం వహిస్తున్న కాంగ్రెస్ సిట్టింగ్ స్థానం కావడంతో ఆ పార్టీ ప్రతిష్టాత్మకంగా భావించింది. రేవంత్రెడ్డి కూడా సీరియస్గానే తీసుకొని అభ్యర్థి ఎంపిక నుంచి పోలింగ్ వరకు ప్రత్యేక దృష్టి సారించారు. ముఖ్యంగా అభ్యర్థి ఎంపిక విషయంలో పూర్తిగా సీఎం తన సొంత నిర్ణయాన్ని తీసుకొని, అధిష్ఠానాన్ని ఒప్పించారని పార్టీ వర్గాలే తెలిపాయి.
వాస్తవానికి చేవెళ్ల పార్లమెంటు స్థానాన్ని ఆశించి పట్నం దంపతులు బీఆర్ఎస్ను వీడి రేవంత్రెడ్డి సమక్షంలో కాంగ్రెస్లో చేరారనేది బహిరంగ రహస్యం. కానీ సీఎం మాత్రం తన సిట్టింగ్ స్థానాన్ని నిలబెట్టుకోవాలనే పట్టుదలతో పట్నం సునీతా మహేందర్రెడ్డిని మల్కాజిగిరి నుంచి బరిలోకి దింపేందుకు నిర్ణయించారు. మల్కాజిగిరి పరిధిలోని కాంగ్రెస్ నేతలు, ఇతర నాయకులు అక్కడి నుంచి పోటీ చేసేందుకు తీవ్ర ప్రయత్నాలు చేశారు. కానీ సీఎం మాత్రం పట్టుబట్టి సునీతా మహేందర్రెడ్డికి టికెట్ ఇప్పించుకున్నారు. అప్పుడు మొదలు పోలింగు వరకు కూడా ముఖ్యమంత్రి, కాంగ్రెస్ పార్టీ నేతలు సిట్టింగ్ స్థానాన్ని నిలుపుకునేందుకు అన్ని ప్రయత్నాలు చేశారు. అయినా ఓటర్లు మాత్రం తీర్పు మరోలా ఇచ్చారు. ఫలితంగా రాష్ట్ర ముఖ్యమంత్రి రేవంత్రెడ్డి తన సిట్టింగ్ స్థానాన్ని కోల్పోవాల్సి వచ్చింది. ఇదే కాంగ్రెస్ పార్టీతో పాటు రాష్ట్ర రాజకీయాల్లో ప్రస్తుతం తీవ్ర చర్చనీయాంశంగా మారింది. సీఎం సొంత జిల్లాలోని మహబూబ్నగర్తో పాటు చేవెళ్ల, మల్కాజిగిరి స్థానాలను కూడా ప్రతిష్ఠాత్మకంగానే తీసుకున్నారు. కానీ సిట్టింగ్ సహా మూడు స్థానాల్లో ఆయనకు ఎదురుగాలి వీయడం గమనార్హం.