బడంగ్పేట, జూన్ 3 : కాంగ్రెస్ ప్రభుత్వానికి రోజులు దగ్గర పడ్డాయని, రాష్ట్ర వ్యాప్తంగా ప్రజలు చర్చించుకుంటున్నారని కవి గాయకుడు , ఎమ్మెల్సీ దేశపతి శ్రీనివాస్ అన్నారు. తెలంగాణ రాష్ట్ర ఆవిర్భావ దశాబ్ది ఉత్సవాల్లో భాగంగా మహేశ్వరం నియోజకవర్గం, మీర్పేట మున్సిపల్ కార్పొరేషన్ పరిధిలోని జిల్లెలగూడ చందన చెరువు కట్టపై ఏర్పాటు చేసిన అమరవీరుల కుటుంబాలకు, ఉద్యమకారుల సన్మాన కార్యక్రమానికి ఆయన ముఖ్య అతిథిగా హాజరయ్యారు. ఆనాడు తెలంగాణ ఉద్యమంలో క్రియాశీలకంగా పనిచేసిన ఎమ్మెల్సీ దేశపతి శ్రీనివాస్, గ్రంథాలయ మాజీ చైర్మన్ అయాచితం శ్రీధర్, గిడ్డంగుల కార్పొరేషన్ మాజీ చైర్మన్ రజినీ సాయిచంద్, మార్కెట్ కమిటీ మాజీ చైర్మన్ పురుషోత్తం రావు, బిరుదు చందర్, రాం నర్సింహ గౌడ్తోపాటు ఉద్యమంలో పనిచేసిన వారిని మాజీ మంత్రి, ఎమ్మెల్యే పి.సబితా ఇంద్రారెడ్డి ఘనంగా సత్కరించారు. అనంతరం ప్రొఫెసర్ జయశంకర్ సార్ చిత్ర పటానికి, అమరవీరుల చిత్రపటాలకు పూలమాలలు వేసి నివాళులర్పించారు. దేశపతి, గిద్దె రామనర్సయ్య, చందర్ పాటలతో ధూంధాం చేశారు. ఈ సమావేశానికి మంత్రి రవీందర్ రావు అధ్యక్షత వహించారు.
ఈ సందర్భంగా ఎమ్మెల్సీ దేశపతి శ్రీనివాస్ మాట్లాడుతూ.. ప్రజా సమస్యలను పూర్తిగా విస్మరించి చిహ్నాలు మార్చడమే పనిగా పెట్టుకున్న రేవంత్ రెడ్డి సర్కార్పై ప్రజలు తిరగబడే రోజులు దగ్గరలోనే ఉన్నాయన్నారు. ఇచ్చిన హామీలను నెరవేర్చకుండా కేసీఆర్పై విమర్శలు చేయడమే పనిగా పెట్టుకున్నారని విమర్శించారు.
మహాలక్ష్మి పథకం కింద మహిళలకు రూ.2500 ఇవ్వకుంటే.. మహంకాళీలై నీ కుర్చీని కూలదోస్తారన్నారు. పేద ప్రజల ఇండ్ల క్రమబద్ధీకరణకు ఎల్ఆర్ఎస్, బీఆర్ఎస్ తీసుకొస్తే తప్పు పట్టిన రేంత్ రెడ్డి ఇప్పుడు మాత్రం ఆస్కీమ్ను అమలు చేస్తామని చెబుతున్నారని అన్నారు. అభివృద్ధి ఎలా చేయాలో తెలియక తికమక పడుతున్నారని తెలిపారు. బీఆర్ఎస్ అధినేత కేసీఆర్ కరంటు సమస్య, నీటి సమస్య లేకుండా ఉత్పత్తిని పెంచారని తెలిపారు. ఉన్నదాన్ని చక్కదిద్దడం చేతకాక తప్పుడు ఆరోపణలకు తెర లేపుతున్నారన్నారు. కాంగ్రెస్ అధికారంలోకి వస్తే కొలువులు ఇస్తామన్న రేవంత్ రెడ్డి ఒక్క దివ్యాంగురాలికి మాత్రమే బహిరంగ సభ పెట్టి ఇచ్చారన్నారు. కేసీఆర్ హయాంలో రాష్ట్రం కోసం బలిదానం చేసుకున్న అమరుల కుటుంబాలకు ఉద్యోగాలు, ఇంటి స్థలాలిచ్చామని చెప్పారు. త్వరలోనే కోదండరామ్ ఇంటి ముందు కొలువుల కొట్లాట మొదలవుతుందన్నారు. అమర వీరుల దినోత్సవం ముందు జరిపితే పాకిస్థాన్కు స్వాతంత్య్ర దినోత్సవం లాగా చేస్తారా? అని ముఖ్యమంత్రి అనడం సిగ్గుచేటు అన్నారు. కాకతీయుల పేరు, చార్మినార్ గుర్తు ఉండకూడదని చెప్పడం చరిత్రను వక్రీకరించినట్లు అవుతుందన్నారు. అమర వీరులకు రేవంత్ రెడ్డి ఏనాడు నివాళులర్పించలేదని.. ముఖ్యమంత్రి అయిన తర్వాత మాత్రం నివాళులర్పిస్తున్నాడని ఎద్దేవా చేశారు.
కేసీఆర్ కీర్తిని ఎవరూ చెరిపేయలేరని.. అది సాధ్యం కాదని ఎమ్మెల్యే పి.సబితా ఇంద్రారెడ్డి అన్నారు. ఉద్యమకారుల కష్టాలు తనకు తెలుసన్నారు. నియోజకవర్గంలో ఏ చిన్న పోస్టు వచ్చినా ఉద్యమకారులకు ఇచ్చామన్నారు. కేసీఆర్ ఆమరణ నిరాహార దీక్ష చేస్తున్న సమయంలో హోంమంత్రిగా తాను వెళ్లడం జరిగిందన్నారు. సాయి చందు మర్చిపోలేని వ్యక్తి అన్నారు. ప్రొఫెసర్ జయశంకర్ సార్తో ఎంతో అనుబంధం ఉందన్నారు. తెలంగాణ అమరులకు గుర్తుగా బడంగ్పేట గ్రౌండ్కు సిరిపురం యాదయ్య పేరు పెట్టుకున్నామని చెప్పారు. ఈ కార్యక్రమంలో మేయర్ దుర్గా దీప్లాల్ చౌహన్, డిప్యూటీ మేయర్ విక్రంరెడ్డి, మాజీ ఎంపీపీ లావణ్య బీరప్ప, మహేశ్వరం నియోజకవర్గం బీఆర్ఎస్ పార్టీ ప్రధాన కార్యదర్శి అరవింద్ శర్మ, మీర్పేట బీఆర్ఎస్ పార్టీ అధ్యక్షుడు కామేష్ రెడ్డి, బడంగ్పేట బీఆర్ఎస్ పార్టీ అధ్యక్షుడు రాంరెడ్డి, కందుకూరు అధ్యక్షుడు యుగేందర్ ముదిరాజ్, శ్రీనివాస్ రెడ్డి, కార్పొరేటర్లు బీరప్ప, అనిల్కుమార్ యాదవ్, భూపాల్ రెడ్డి, రాజేందర్ రెడ్డి, బీఆర్ఎస్ నాయకులు, కార్యకర్తలు, ఉద్యమ నాయకులు ఉన్నారు.