శంషాబాద్ రూరల్, జూలై 15 : తెలంగాణ రాష్ట్రం ఏర్పడిన నాటి నుంచి 4 నుంచి 5వేల కోట్ల రూపాయలతో అప్పటి సీఎం కేసీఆర్, మంత్రి కేటీఆర్ ఆధ్వర్యంలో రాజేంద్రనగర్ నియోజకవర్గాన్ని అభివృద్ధి చేశానని అనేకసార్లు సభలు, సమావేశాల్లో ప్రకటించిన ఎమ్మెల్యే ప్రకాశ్గౌడ్..మరీ ఏ అభివృద్ధి కోసం పార్టీ మారారో ప్రజలకు చెప్పాల్సిన అవసరమున్నదని బీఆర్ఎస్ రాష్ట్ర నేత కార్తిక్రెడ్డి అన్నారు.
సోమవారం శంషాబాద్ పట్టణంలోని బీఆర్ఎస్ జిల్లా కార్యాలయంలో ఏర్పాటు చేసిన మీడియా సమావేశంలో ఆయన మాట్లాడుతూ రాజేంద్రనగర్ నియోజకవర్గానికి దాదాపు 5వేల కోట్ల రూపాయల నిధులు ఇచ్చిన బీఆర్ఎస్ను కాదని.. కాంగ్రెస్లో చేరిన ఎమ్మెల్యే ప్రకాశ్గౌడ్ నియోజకవర్గంలో ఎలాంటి అభివృద్ధి చేస్తారో చెప్పాలన్నారు. నియోజకవర్గంలో ప్రభుత్వ భూములను కబ్జా చేయడానికే పార్టీ మారినట్లు వినిపిస్తున్న వార్తలు నిజమేనా.. అని ప్రశ్నించారు. ఒకవేళ అదే జరిగితే.. ప్రభుత్వ భూములను పట్టా భూములుగా మార్చాలని చూస్తే ఊరుకునేదిలేదని హెచ్చరించారు. కేసీఆర్ను మోసం చేసి పార్టీ మారుతున్న నాయకులకు సరైన కాలంలో తగ్గిన శాస్తి జరుగుతుందన్నారు.