Strike | సిటీబ్యూరో, జూన్ 24 (నమస్తే తెలంగాణ)/ బన్సీలాల్పేట : జూనియర్ డాక్టర్లు తలపెట్టిన నిరవధిక సమ్మెతో రోగులకు ఇబ్బందులు తప్పడం లేదు. తమ డిమాండ్లను పరిష్కరించడంలో ప్రభుత్వం విఫలమవడంతో జూడాలు ఇటీవల ఇచ్చిన సమ్మె నోటీసు ప్రకారం సోమవారం రాష్ట్ర వ్యాప్తంగా నిరవధిక సమ్మెకు దిగారు. దీంతో నగరంలోని పేట్లబుర్జు ప్రసూతి దవాఖాన, సుల్తాన్బజార్ ప్రసూతి దవాఖాన, ఉస్మానియా, గాంధీ, నిలోఫర్, ఎంఎన్జే, కోఠి ఈఎన్టీ,
ఎర్రగడ్డ ఛాతీ దవాఖాన, ఎర్రగడ్డ మానసిక రోగుల దవాఖానల్లో రోగులకు ఇబ్బందులు తప్పలేదు. సాధారణంగా సెలవు తరువాత రోజులు దవాఖానల్లో రద్దీ ఉండటం సహజం. ఈ క్రమంలోనే సోమవారం నగరంలోని అన్ని ప్రభుత్వ టీచింగ్ హాస్పిటల్స్ రోగులతో కిక్కిరిసిపోయాయి. జూడాల సమ్మె మొదలవడంతో రోగులు కొంత ఇబ్బందులకు గురయ్యారు. చాలా దవాఖానల్లో రోగులకు ఓపీ చూసేది జూడాలే.అయితే జూడాలు సమ్మెబాట పట్టడంతో ఇబ్బందులు పడ్డామని పలువురు రోగులు, వారి సహాయకులు ఆరోపించారు.
జూడాల సమ్మెను దృష్టిలో పెట్టుకుని రోగులకు ఎలాంటి ఇబ్బందులు తలెత్తకుండా ప్రత్యామ్నాయ చర్యలు తీసుకున్నాం. ఫ్యాకల్టీల సెలవులను రద్దు చేశాం. ఇప్పటికే సెలవులో ఉన్న ఫ్యాకల్టీలను సైతం అత్యవసరంగా వెనక్కి రప్పించాం. అన్ని విభాగాలకు సంబంధించిన ఓపీల్లో ఫ్యాకల్టీ ఉండే విధంగా ముందస్తు ప్రణాళిక రూపొందించాం. దీని వల్ల రోగులపై సమ్మె ప్రభావం పెద్దగా లేదని చెప్పవచ్చు. జూడాలు అత్యవసర విధులను బహిష్కరించలేదు.
-డా.నాగేందర్, సూపరింటెండెంట్, ఉస్మానియా జనరల్ హాస్పిటల్
జూడాల సమ్మె ప్రభావం రోగులపై పడకుండా ఉండేందుకు అవసరమైన అన్ని రకాల చర్యలు తీసుకున్నాం. అత్యవసర శస్త్ర చికిత్సలను ఆపొద్దని చెప్పాం. ఇందులో భాగంగా వైద్య కళాశాల ప్రిన్సిపాల్, వైస్ ప్రిన్సిపాల్, దవాఖానలోని ఆర్ఎంవోలు, ఫ్యాకల్టీలు, ఇతర వైద్యసిబ్బందితో కలిసి అత్యవసర సమావేశం ఏర్పాటు చేశాం. ఈ సమావేశంలో రోగులపై సమ్మె ప్రభావం పడకుండా చూడాలని అధికారులు, సిబ్బందికి సూచించాం. ఈ క్రమంలో అన్ని విభాగాల ఫ్యాకల్టీల సెలవులను రద్దు చేశాం. విభాగాధిపతులు, ప్రొఫెసర్లకు కేటాయించిన వివిధ వైద్య కళాశాలలు, హాస్పిటల్స్కు సంబంధించిన అన్ని రకాల ఇన్స్పెక్షన్ డ్యూటీలను రద్దు చేశాం.
– డా.రాజారావు, సూపరింటెండెంట్, గాంధీ దవాఖాన