సిటీబ్యూరో, డిసెంబర్ 7 (నమస్తే తెలంగాణ) : వృత్తి నైపుణ్యం మెరుగుపడితేనే ఉపాధి అవకాశాలు స్థిరంగా ఉంటాయని, దీనికోసం నిపుణులు తమను తాము మార్కెట్ అవసరాలకు అనుగుణంగా తీర్చిదిద్దు కోవాల్సిన అవసరం ఉందని రాష్ట్ర ఐటీ శాఖ ప్రిన్సిపల్ సెక్రెటరీ జయేశ్ రంజన్ అన్నారు. బుధవారం నగరంలో నిర్వహించిన పీఎస్ఎఫ్ ప్రొఫెషనల్ సమ్మిట్-2022లో ఆయన ముఖ్య అతిథిగా పాల్గొన్నారు.
అనంతరం ఆయన మాట్లాడుతూ.. ఆర్థిక మాంద్యం వివిధ రంగాలపై ప్రభావం చూపుతున్నది. ఈనేపథ్యంలో ఆయా రంగాల్లో విధులు నిర్వహిస్తున్న వారు మెరుగైన నైపుణ్యం కలిగి ఉంటేనే రాణించేందుకు అవకాశం ఉంటుందన్న విషయాన్ని గుర్తించాలన్నారు. కార్యక్రమంలో టీ హబ్ సీఈఓ ఎం.శ్రీనివాసరావు, లివింగ్ లైఫ్ వ్యవస్థాపకుడు రాహుల్ జైన్, అడ్వెంచర్ పార్క్ సీఈఓ మెరాజ్ పహీం, ఒప్పో ఇండియా డీజీఎం మునావర్ ఖాన్, లైఫ్ కోచ్ కలీం తదితరులు పాల్గొన్నారు.