బడంగ్పేట, జూలై 20 : బడంగ్పేట మున్సిపల్ కార్పొరేషన్లో రూ.37.23 కోట్ల వివిధ అభివృద్ధి పనులకు శనివారం మంత్రి శ్రీధర్బాబు శంకుస్థాపన చేశారు. ప్రజాభవనం ముందు మొక్కలు నాటారు. అనంతరం మేయర్ చిగిరింత పారిజాత నర్సింహారెడ్డి అధ్యక్షతన సమావేశాన్ని ఏర్పాటు చేశారు. ఈ సందర్భంగా ప్రొటోకాల్ పాటించకుండా కాంగ్రెస్ నేతలను వేదికపై కూర్చోబెట్టడంతో రగడ మొదలైంది. అధికారిక కార్యక్రమాలకు కాంగ్రెస్ పార్టీ ఇన్చార్జి లక్ష్మారెడ్డి, మాజీ ఎమ్మెల్యే తీగల కృష్ణారెడ్డి, ఇబ్రహీంపట్నం కాంగ్రెస్ నేత నీరంజన్రెడ్డి, కందుకూరుకు చెందిన జంగారెడ్డి, దేపా భాస్కర్రెడ్డి తదితర కాంగ్రెస్ నేతలను వేదికపైకి పిలిచారు.
దీంతో కార్పొరేటర్ల పేర్లు పిల్వకుండా కార్యక్రమానికి సంబంధం లేని వ్యక్తులను ఎలా పిలుస్తారంటూ.. బీఆర్ఎస్, బీజేపీ కార్పొరేటర్లు తీవ్ర అభ్యంతరం తెలిపారు. ఈ క్రమంలో మేయర్ చిగిరింత పారిజాత నర్సింహారెడ్డి, కాంగ్రెస్ ఫ్లోర్ లీడర్ వంగేటి ప్రభాకర్రెడ్డి బీజేపీ, బీఆర్ఎస్ కార్పొరేటర్లతో వాగ్వాదానికి దిగడమే కాకుండా.. ఇలానే చేస్తాం ఏమి చేసుకుంటారో చేసుకోమన్నారు. అయితే అర్బన్ ఫైనాన్స్ ఇన్ఫ్రాస్ట్రక్చర్ డెవలప్మెంట్ చైర్మన్ చల్లా నర్సింహారెడ్డి కార్పొరేటర్లకు నచ్చచెప్పే ప్రయత్నం చేశారు. అప్పటికే సమస్య జఠిలమైంది. అభివృద్ధి పనుల కార్యక్రమానికి పిలిచి అవమానించడం ఏమిటని బీజేపీ, బీఆర్ఎస్ కార్పొరేటర్లు ప్రశ్నించారు. అనంతరం సమావేశాన్ని బహిష్కరించి వెళ్లిపోయారు. కాగా, మంత్రి శ్రీధర్బాబు ముందే ఈ తతంగం అంతా జరగడంతో ఆయన అధికారులపై ఆగ్రహం వ్యక్తం చేశారు. సమావేశంలో ఇంత గందరగోళం జరిగితే ఏం చేస్తున్నారని వారిని ప్రశ్నించారు. అధికారులు ఇష్టం వచ్చినట్లు వ్యవహరించడంపై మండిపడ్డారు.
సమావేశంలో మంత్రి శ్రీధర్బాబు మాట్లాడుతూ ఉచిత బస్సు ప్రయాణానికి రూ.300 కోట్లు ఆర్టీసీకి చెల్లిస్తున్నామని, 200 యూనిట్ల వరకు ఉచిత కరెంటు, రాయితీపై గ్యాస్ సిలిండర్ ఇస్తున్నామన్నారు. రైతులకు లక్ష రూపాయల రుణ మాఫీ చేసినట్లు చెప్పారు. ఆగస్టులో రెండో దశ రుణమాఫీ చేస్తామన్నారు. ప్రభుత్వ పాఠశాలల్లో ఉన్న సమస్యలను పరిష్కరించేందుకు అమ్మ ఆదర్శ పాఠశాలల ద్వారా అభివృద్ధి పనులకు రూ.700 కోట్లు కేటాయించినట్లు చెప్పారు. కార్యక్రమంలో డిప్యూటీ మేయర్ ఇబ్రాం శేఖర్, అడిషనల్ కలెక్టర్ భూపాల్రెడ్డి, ఆర్డీవో సూరజ్ కుమార్ తదితరులు పాల్గొన్నారు.
అభివృద్ధి పనుల కార్యక్రమంలో ప్రొటోకాల్ గురించి ప్రస్తావిస్తే.. పోలీసులతో అణిచివేస్తారా అంటూ.. బీఆర్ఎస్ కార్పొరేటర్లు సూర్ణ గంటి అర్జున్, రామిడి కవితా రాంరెడ్డి, దీపిక శేఖర్ రెడ్డి, యాతం పవన్ యాదవ్, ఏనుగు రాంరెడ్డి, ముత్యాల లలితకృష్ణ, రోణిరమేశ్, శివకుమార్, పెద్ద బావి శ్రీనివాస్ రెడ్డి, కో ఆప్షన్ సభ్యడు ఖలీల్ తదితరులు అన్నారు. మంత్రి శ్రీధర్ బాబు సమక్షంలోనే ప్రొటోకాల్ ఉల్లంఘిస్తే ఎలా.. అని వారు ప్రశ్నించారు. కార్యక్రమానికి సంబంధం లేని వ్యక్తులను వేదికపైకి ఆహ్వానించి.. చివరకు కార్పొరేటర్లను ఎలా పిలుస్తారని మండిపడ్డారు. పోలీసులను పెట్టి బయటకు గెంటివేయడం ఏమిటని అన్నారు. ఎంపీ, ఎమ్మెల్యే లేకుండా అధికారిక కార్యక్రమాన్ని నిర్వహించడంపై అభ్యంతరం వ్యక్తం చేశారు.