సిటీబ్యూరో, జూన్ 18 (నమస్తే తెలంగాణ): ఉప్పల్ క్రికెట్ స్టేడియం చెల్లించాల్సిన విద్యుత్ బిల్లుల బకాయిలను మంగళవారం చెల్లించింది. ఖైరతాబాద్లోని దక్షిణ తెలంగాణ విద్యుత్ పంపిణీ సంస్థ (డిస్కం) కార్పొరేట్ కార్యాలయంలో హైదరాబాద్ క్రికెట్ అసోసియేషన్ అధ్యక్షుడు జగన్మోహన్రావు మొత్తం బిల్లు రూ.1,48,94,521లను చెక్కు రూపంలో సీఎండీ ముషారఫ్ ఫరూఖీకి అందజేశారు. 2015లో ఈ వివాదం మొదలైంది. ఐపీఎల్ క్రికెట్ జరుగుతున్న సమయంలో రూ.15 లక్షలు చెల్లించామని మిగిలిన మొత్తం 4 నుంచి 5 వాయిదాల్లో చెల్లిద్దామని ఆలోచన చేసినా హెచ్సీఏ పేరు ప్రతిష్టతలను దృష్టిలో ఉంచుకొని ఒకేసారి అంతా చెల్లించామని చెప్పారు. ఐపీఎల్ క్రికెట్ జరుగుతున్న సమయంలో విద్యుత్ బిల్లు పెండింగ్లో ఉందనే కారణంతో క్రికెటర్లు ప్రాక్టీసు చేస్తుండగా కరెంట్ కట్ చేసి, హైదరాబాద్, తెలంగాణ బ్రాండ్ ఇమేజ్ను దెబ్బతీసే విధంగా ప్రవర్తించిన అధికారులపై చర్యలు తీసుకోవాలని సీఎండీని జగన్మోహన్రావు కోరారు. పదేండ్ల కింద మొదలైన ఈ సమస్యకు తమను బాధ్యులను చేస్తూ, ఐపీఎల్ జరుగుతున్న సమయంలో కొందరు అధికారులు అత్యుత్సాహం ప్రదర్శించడంతో పాటు జాతీయ స్థాయిలో ఈ విషయం సంచలనమైందని, ఇందుకు కారణమైన వారిపై చర్యలు తీసుకోవాలని ఆయన కోరారు.