BRS Party | హైదరాబాద్ : గ్రేటర్ హైదరాబాద్ బీఆర్ఎస్ నేతలు సమావేశం అయ్యారు. ఈ భేటీకి ఎమ్మెల్యేలు తలసాని శ్రీనివాస్ యాదవ్, మాగంటి గోపీనాథ్, మహముద్ అలీతో పాటు జీహెచ్ఎంసీ కార్పొరేటర్లు హాజరయ్యారు. రేపు జీహెచ్ఎంసీ కౌన్సిల్ భేటీ సందర్భంగా బీఆర్ఎస్ నేతలు సమావేశం అయ్యారు. జీహెచ్ఎంసీ కౌన్సిల్ భేటీ, భవిష్యత్లో అనుసరించాల్సిన వ్యూహంపై చర్చించారు.
మరికాసేపట్లో ఎమ్మెల్యే తలసాని శ్రీనివాస్ యాదవ్ అధ్యక్షతన తెలంగాణ భవన్లో గ్రేటర్ ప్రజాప్రతినిధులు, కార్పొరేటర్లతో సమావేశం జరగనున్నది. ఈ సమావేశానికి ముఖ్యఅతిథిగా బీఆర్ఎస్ వర్కింగ్ ప్రెసిడెంట్ కేటీఆర్ హాజరుకానున్నారు. శనివారం జీహెచ్ఎంసీ సర్వసభ్య సమావేశం (కౌన్సిల్) ఉన్న నేపథ్యంలో ఈ సమావేశం ప్రాధాన్యత సంతరించుకున్నది. ఇప్పటికే మేయర్ గద్వాల్ విజయలక్ష్మి, డిప్యూటీ మేయర్ మోతె శ్రీలతాశోభన్రెడ్డి బీఆర్ఎస్ పార్టీని వీడి కాంగ్రెస్ పార్టీలో చేరారు. ఈ నేపథ్యంలోనే కౌన్సిల్లో బీఆర్ఎస్ అనుసరించాల్సిన వ్యూహాలపై చర్చించేందుకు ఎమ్మెల్యేలు, ఎమ్మెల్సీలు, కార్పొరేటర్లకు కేటీఆర్ దిశానిర్దేశం చేయనున్నారు.