మాదాపూర్, మే 29: హఫీజ్పేటలోని సాయినగర్, యూత్ కాలనీలో భారీ ఈదురు గాలులు, వర్షం కారణంగా ఈ నెల 26న బాల్కనీ గోడ, రేకుల ఇండ్లు కూలిపోయిన వేర్వేరు ఘటనల్లో ఇద్దరు మృతి చెందగా.. వారి కుటుంబాలకు ప్రభుత్వం బుధవారం ఆర్థిక సాయం అందజేసింది. రెండు రోజుల కిందట బీఆర్ఎస్ పార్టీ వర్కింగ్ ప్రెసిడెంట్ కేటీ రామారావు, స్థానిక ఎమ్మెల్యే అరెకపూడి గాంధీ, బీఆర్ఎస్ పార్టీ నాయకులు కలిసి ఘటనా స్థలాన్ని సందర్శించారు. బాధిత కుటుంబ సభ్యులను పరామర్శించి, ఆర్థిక సాయం అందజేశారు. అనంతరం రాష్ట్ర ప్రభుత్వం బాధిత కుటుంబాలకు రూ.10 లక్షల ఆర్థిక సాయం చేయాలని డిమాండ్ చేశారు. స్పందించిన ప్రభుత్వం బుధవారం బాధిత రెండు కుటుంబాలకు నాలుగు లక్షల రూపాయల చొప్పున ఆర్థిక సాయాన్ని అందజేసింది. ఈ సాయాన్ని తాసీల్దార్ వెంకారెడ్డి ఆదేశాల మేరకు ఆర్ఐ శ్రీను బాధిత కుటుంబాలకు చెక్కు రూపంలో అందజేశారు.