సిటీబ్యూరో, సెప్టెంబర్ 1(నమస్తే తెలంగాణ): స్వతంత్ర భారత వజ్రోత్సవాల ముగింపు వేడుక శుక్రవారం శేరిలింగంపల్లి నియోజకవర్గంలోని హెచ్ఐసీసీలో కన్నుల పండువగా కొనసాగింది. తెలంగాణ భాషా సాంస్కృతిక శాఖ, సంగీత నాటక అకాడమీల సంయుక్త ఆధ్వర్యంలో నిర్వహించిన పలు సాంస్కృతిక కార్యక్రమాలు దేశ ఔన్నత్యాన్ని చాటుతూ వీక్షకులను ఔరా! అనిపించాయి. వేదికపై కొనసాగిన ప్రతి కార్యక్రమం తెలంగాణ ప్రగతికి అద్దం పట్టాయి. ఈ కార్యక్రమానికి ముఖ్య అతిథిగా సీఎం కేసీఆర్ హాజరు కాగా, ఆయనకు పలువురు మంత్రులు, ప్రభుత్వ ప్రధాన కార్యదర్శి శాంతి కుమారి, ప్రభుత్వ విప్, స్థానిక ఎమ్మెల్యే అరికెపూడి గాంధీ, డీజీపీ అంజన్ కుమార్ యాదవ్, ఉన్నతాధికారులు ఘన స్వాగతం పలికారు. సీఎం జాతీయ పతాకాన్ని ఆవిష్కరించి, జాతీయ గీతాన్ని ఆలపించారు. అనంతరం, పోలీసుల గౌరవ వందనాన్ని స్వీకరించారు. భరతమాత, గాంధీ మహాత్ముడి విగ్రహాలకు సీఎం పుష్పాంజలి ఘటించారు. వేదికపై కొనసాగిన పలు ఆటలు, పాటలు, సాంస్కృతిక కార్యక్రమాలు ఎంతగానో ఆకట్టుకున్నాయి. కార్యక్రమంలో పలువురు మంత్రులు, ఎంపీలు, ఎమ్మెల్సీలు, ఎమ్మెల్యేలు, పలు కార్పొరేషన్ల చైర్మన్లు, చైర్పర్సన్లు, పలు విభాగాల ఉన్నతాధికారులు పాల్గొన్నారు.