సిటీబ్యూరో, జూన్ 3 (నమస్తే తెలంగాణ): సర్జరీ చేసేందుకు లంచం డిమాండ్ చేసిన గాంధీ దవాఖాన వైద్యుడిపై విచారణ పూర్తయింది. దర్యాప్తు నివేదికను దవాఖాన సూపరింటెండెంట్ డా.రాజారావు సీల్డ్ కవర్లో డీఎంఈకి సమర్పించారు. గాంధీ దవాఖానలో శస్త్రచికిత్స చేసేందుకు ఓ వైద్యుడు రోగి వద్ద డబ్బులు డిమాండ్ చేసినట్లు ఇటీవల దవాఖాన సూపరింటెండెంట్కు ఫిర్యాదు అందిన విషయం తెలిసిందే. దీనిని సీరియస్గా తీసుకున్న గాంధీ సూపరింటెండెంట్ ఇచ్చిన ఫిర్యాదుపై నాలుగు విభాగాధిపతులతో ప్రత్యేక కమిటీని ఏర్పాటు చేసి, విచారణకు ఆదేశించారు. ప్రత్యేక కమిటీ విచారణ జరిపి సూపరింటెండెంట్కు నివేదికను సమర్పించింది. ఈ మేరకు నివేదికను గాంధీ సూపరింటెండెంట్ డా.రాజారావు డీఎంఈకి సీల్డ్ కవర్లో సమర్పించారు. నివేదిక ఆధారంగా ఒకటి రెండు రోజుల్లో ఆరోపణలు ఎదుర్కొంటున్న వైద్యుడిపై డీఎంఈ చర్యలు తీసుకునేందుకు రంగం సిద్ధం చేస్తున్నట్లు సమాచారం.